buletina-img.jpg

Azken egunotako elurteek asko zaildu dute errepideetako egoera eta astebururako iragarrita dagoen eguraldiak badirudi arazoak areagotu egingo dituela. Horren aurrean, Gipuzkoako Foru Aldundiak eta Azkoitiko Udaltzaingoak eskatu diete herritarrei asteburuan ibilgailurik ez hartzeko derrigorrezkoa ez bada. Halaber, murrizketez ohartarazi dute. Izan ere, landa bideak itxita egongo dira, esaterako, Elosua, Madariaga edota Martirietako bideak. Auzoetako bizilagunentzat egongo dira zabalik soilik. Gainerakoan larrialdi kasuren bat suertatzen bada bakarrik erabili ahalko dira baserri edo auzo-bideak.

Udaltzaingoak hesitu eta itxi egin du Altzibar eta Jausoro lotzen dituen oinezkoen zubia, orga jasotzaile batek eragindako kalteen ondorioz. Udalerriko enpresa batek zerabilkien orgak azpiegitura zulatu egin du punta batean eta oinezkoen segurtasuna bermatze aldera, zubia ez da irekiko konpontzen duten arte.

Gizarte Zerbitzuek ez dute aurrez aurreko zerbitzurik eskainiko urtarrilaren 8an, 11n eta 12an bulegoan obrak egin behar dituztelako. Egun horietan sailarekin harremanetan jartzeko 943 85 71 74 telefonora deitu daiteke goizeko 9:00etatik 14:30era.

Pultsadore edo sakagailuarekin ibiltzen diren kaleko iturriak itxi egingo dira egun hauetako izozteek hondatu ez ditzaten. Izan ere, iturrien mekanismoak funtzionatzeari uzten dio eta matxuratu egiten da barruan daraman malgukia izozten bada. Horixe gertatu da justu herriko bi iturritan eta ondorioz, eguraldi txarra baretu eta tenperaturak igotzen hasten diren bitartean, iturriak itxita egongo dira.
Neurri honek ez du eraginik sakagailurik ez duten iturrietan. Normal jarraituko dute, esaterako, Herriko plazako iturriak edota Barriketakoak.

Xabier Munibe Haurreskolak 2020/2021 ikasturteko matrikula epearen inguruan ondorengo informazioa zabaldu du:

Matrikulazioa epea urtarrilaren 7tik urtarrilaren 13ra izango da.
Edonola ere, ikasturtean zehar ere posible da matrikulatzea. Kontutan izan, berehala hasi nahi dutenentzat, matrikula inprimakia ekarri eta 10 egun behar izaten direla haurra hasi ahal izateko.

Errege Magoak Azkoitiko haurrak agurtzen ibili dira gaur arratsaldean, etxez etxe opari banaketarekin hasi aurretik. Covid 19ak eragindako segurtasun neurriak tarteko, ibilgailu batean zeharkatu dituzte kale eta auzoak Parrokiara iritsi arte. Udalak lagunduta, urtero Parrokiak antolatzen du Errege Magoen kabalkada eta hirukoteak elizan egin du geraldia Jesus haurrari gurtza egiteko.

Usadioa bihurtu da jada Gazte Astearen baitan Artxamendi Topalekuak antolatu ohi duen Gabonetako patata tortilla lehiaketa. Gaur goizean Kontzejupean gogotik saiatu dira gazteak tortillarik hoberena egiteko. 40 taldek eta 140 neska-mutilek hartu dute parte eta talde bakoitzak tortilla bat aurkeztu du lehiaketara. Epaimahaiak ez du lan erraza izan guztiak dastatzen eta baloratzen. Azkenean, bi sari eman ditu, egindako bi tortilla hoberenak sarituz. Lehenengo txandan Elene Isasa eta Maialen Arratibel zan dira sarituak. Bigarrengoan, berriz, Jon Ucin, Julen Sanz eta Aimar Ormazabalen tortilla izan da onena.

Al Ar Az Og Or Lr Ig
2
Data : 2020-11-02
3
4
5
10
11
12
17
18
19
24
25
© 2019 Azkoitiko Udala. Lege oharra