Berriak
Udalbatza plenoaren ez ohiko bilkura
Ekainaren 17an, 12:00etan izango da.
PUNTU BAKARRA.- Udal berriaren eraketa.
1) Adin-Mahaiaren eraketa
2) Aldez aurreko egiaztepenak: Kredentzialak eta aitorpena.
3) Korporatiboen Jabetza-hartzea.
4) Alkatearen hautaketa.
Gu ere bertsotan egitasmoan parte hartu duten ikasleen bertso saioa
Udaleko Euskara sailak babestuta, "Gu ere bertsotan" egitasmoan parte hartu duten ikasleek bertso saioa eskaini zuten atzo Baztartxon, Irati Arretxeren gidaritzapean, eta Iñaki Gurrutxaga eta Eneritz Artetxe bertsolariak bidelagun zituztela. Xabier Munibe Ikastolako, Bizilore Eskola Aktibok eta Florega ikastetxeko gaztetxoek emanaldi aparta eman zuten.
Hobekuntza lanak hasi dituzte San Juango futbol zelaian eta tenis pistetan
Aste honetan hasi dituzte San Juango futbol zelaian eta Txerloiko tenis pistetako hobekuntza lanak. Batean, belar artifiziala berrituko da, eta bestean, hiru pistetako lurzorua konponduko da.
San Juango futbol zelaiak duen belar sintetikoa 2009an jarritakoa da, eta denboraren eta eman zaion erabilera intentsoaren eraginez, hondatuta geratu da, eta berritu beharrean zegoen.
Bailarako errealitate sozioekonomikoa ezagutzen
Iraurgi Berritzenen zuzendaritzapean, bailarako ikastetxeetako gazteek bertako errealitate sozioekonomikoa hurbiletik ezagutzeko parada dute "Elkarrekin Eraikitzen" proiektua tarteko. Helburua da, bailarako eragileekin elkarlanean, ikasleak etorkizunean lan merkatuak eskatuko dizkieten gaitasunetan trebatzea, hala nola, talde-lana, komunikazioa, sormena, autonomia edota iniziatibarako ahalmena landuz. Proiektuan 300 ikaslek eta 60 eragile inguruk hartu dute parte.
Urola Erdiko Zientzia eta Teknologia azoka egin dute bailarako bost ikastetxetako ikasleek
Urola Erdiko Zientzia eta Teknologia Azoka egin dute gaur goizean bailarako bost ikastetxetako ikasleek. Azkoitia BHI-k, Floreaga Ikastetxeak, Urola Ikastolak, Azpeitiko Ikastolak eta Iraurgi Ikastetxeak hartu dute parte, Iraurgi Berritzenek gidaritza eta koordinaziopean garatzen den egitasmoan. 300 ikaslek hartu dute parte.
Proiektuaren helburu nagusia da zientzia eta teknologia alorretako ikasgaietan ikaslea ikasketa prozesuaren protagonista izatea, hainbat gaitasunetan trebatzen joateko. Ikasleek proiektu bidez eta talde-lanean aritzen dira. Arakatzen eta ikertzen ikasten dute, sormena lantzen eta hausnartzen.
Udalak emakume azkoitiar batek jasandako eraso matxista salatu du
Azkoitiko Udalak emakume azkoitiar batek Azpeitiko Sanjuandegi auzoko jaietan jasandako eraso matxistaren aurrean, bere gaitzespenik irmoena adierazten du. Halaber, udal arduradunak emakumearekin harremanetan jarri dira babesa helarazteko, eta Udalaren laguntza eta baliabideak eskaintzeko.
"Azkoitiko Udalak eta Azkoitiko herriak ez dute inolaz ere onartzen indarkeria matxistarik, ez hemen, ez ondoko herrian, ez inon", adierazi du Berdintasun zinegotzi Mertxe Zubillagak. "Emakumeen eskubideak urratzen dituen adierazpen oro irmoki salatzen dugu, eta ozen esaten jarraituko dugu horrelako gertakariek ez dutela tokirik gure gizartean".
Garbiñe Muguruza tenislariak bere izena eramango duen Txerloiko tenis pista bisitatuko du uztailean
Aita, Jose Antonio Muguruza, azkoitiarra da, San Martin auzokoa. 1978an Venezuelara emigratu zuen, eta han jaio zen bere alaba. Garbiñe Muguruza bere aitaren jaioterrian izango da bisitan uztaileko lehen astean, eta Txerloiko tenis pistak bisitatuko ditu. Bere kirol ibilbidearengatik eta bere sustraiak gogoan izateagatik, pista estaliak bere izena eramango du.
Teniseko pista estalia estreinatu eta urtebete eta hilabete geroago, Roland Garrosen eta Wimbledonen txapeldun izandako Garbiñe Muguruza tenislari famatuaren bisita jasoko du Txerloia Tenis Klubak uztailaren 7an. 29 urterekin, kirolariak arnasaldi bat hartzea erabaki zuen otsailean Abu Dabin jokatutako txapelketaren ostean. Horrela, agendan tartetxo bat egin ahal izan du jarduneko alkate Javier Zubizarretari emandako hitza betetzeko. Izan ere, alkatea duela urte eta erdi baino gehiago jarri zen harremanetan tenislariaren ordezkaria den Cecilia Casla donostiarrarekin. Lehen kontaktua egiten Jose Mari Flores herritarrak lagundu zion Zubizarretari.
Uztailaren 23ko hauteskunde orokorretarako hautesle erroldaren erakusketa
Azkoitiko Udalak jakinarazi du uztailaren 23ko hauteskunde orokorretarako erabiliko den hautesle erroldaren jendaurreko erakusketa abian dela. Ekainaren 12ra bitartean, ikusgai egongo dira zerrendak udaletxeko Herritarren Arreta Zerbitzuan, dagokioen erreklamazioak egin ahal izateko.
| Al | Ar | Az | Og | Or | Lr | Ig |
|---|---|---|---|---|---|---|
|
1
|
2
|
3
| ||||
|
4
|
5
|
6
|
7
| |||
|
11
|
12
|
13
|
14
|
15
| ||
|
19
|
20
|
21
|
22
| |||
|
26
|
27
|
28
|
29
| |||
