Udaleko Ingurumen sailak zabalik du ingurumenarekin lotutako jarduerak edo programak diruz laguntzeko eskaera epea. Dirulaguntza eskatzeko azken eguna maiatzaren 11 izango da.
Dirulaguntza eska dezakete jarduera eremua Azkoitian duten entitate, elkarte edo erakundeek, eta baita, ingurumena hobetzeko helburuarekin eskuarki eta noizean behin jarduera jakin baterako elkartzen diren banakoek edo taldeek.

Eusko Jaurlaritza Floreagan eraikitzen ari den etxebizitzen artean, 14 alokairura bideratutako etxebizitza sozialak dira. Horietan izen-emate epea zabalik dago eta apirilaren 12ra arte luzatuko da. Hori bai, izena emateko derrigorrezkoa da hainbat baldintza betetzea.
Eskaera egiteko, eskatzaileak Etxebiden alta emanda egon beharko du alokairuko eskatzaile gisa, gutxienez martxoaren 29a baino lehenagotik, alegia, esleitze prozesuaren agindua Euskal Herriko Agintaritzaren Aldizkarian argitaratu aurretik.

Azkoitia BHI-ko 300 gazte bildu dira gaur goizean Baztartxo Antzokian, Eusko Jaurlaritzako Segurtasun sailaren “Don’t be Dummy / Zuk ez duzu ordezkorik” egitasmoaren bueltan. Proiektuaren helburua da gazteak sentsibilizatzea bide-segurtasunean, gidatze arduratsuan eta trafiko istripuen prebentzioan. Horren baitan, zuzeneko testigantzak entzuteko eta bizitzeko parada eskaintzen zaie ikasleei. Gaurkoan, hiru lagun igo dira oholtzara: Suhiltzailea den Roberto Martija, Azkoitiko udaltzain Mertxe del Sol eta bizkarrezur-muineko lesioa duen Alaitz Arbilla. Hirurek euren esperientziak eta bizipenak partekatu dituzte gazteekin.

1980ko martxoaren 29an Jose María Piris etxera bueltan zen bere lagun Fernando García Lópezekin, futbol partida baten ondoren. Jose Marik 13 urte zituen, Fernandok 12. Fernandoren aitaren kotxean zetozen. Autotik ateratzerakoan pakete bat ikusi zuten lurrean eta Jose Marik hartzearekin batera lehertu zen. Guardia Zibil baten autoaren azpian jarritako bonba bat zen paketea. Auto azpitik erori eta lurrean geratu zen. Leherketaren ondorioz, momentuan hil zen Jose Marí eta laguna larriki zaurituta geratu zen.

Jazoeraren ondoren, Piriz Carballo familia Extremadurara bueltatu zen. Orain, 42 urte eta gero, Jose Maríren anaia eta familia Azkoitira etorri dira hura omentzera eta Fernandorekin elkartzera.

Arantxa Urretabizkaiaren ibilbideari aitortza eginez eman zaio irekiera Geure Gelatik Liburu Azokari, eta “Zergatik panpox?”en egileak hainbat bizipen, iritzi, oroitzapen eta pasarte partekatu ditu bertaratu diren herritarrekin, Juan Luis Zabalaren eskutik. Azaldu duenez, literaturan ez du aldez aurretik pentsatzen. “Ez naiz batere arrazionala, senari jarraitzen diot”, esan du. 

Apirilaren 20an aterako du Urretabizkaiak bere hurrengo eleberria “Azken Etxea” izenburupean. “Edadeko emakume baten istorioa da, baina ez da amona maitagarri bat. Emakume zahar bat aipatutakoan, irudimenera etortzen zaigun iruditik oso urruti dago. Ez da emakume arrunta”.

Erreziboak helbideratuak dituztenei jakinarazten zaie datorren apirilaren 4an Ibilgailuen gaineko zerga kontu korrontetik pasako dela.
Helbideratu ez diren erreziboak posta arruntaz bidali dira, jadanik ez baduzu jaso Azkoitiko Udalaren Harrera Bulegoan eskatu beharko duzu. Borondatezko epea, errezibo hauek ordaintzeko, apirilaren 19an amaitzen da.

Udalarekin elkarlanean, haurren eta helduen danborrada antolatzen jarraitzeko herritar talde batek Tata Elkartea sortu du, Umore Ona elkarteari erreleboa hartuta. Dozena bat lagun bildu dira eta gogor ari dira dagoeneko lanean apirilaren 23ko umeen danborrada prestatzen. Karroza ere prest dute, eta aurreratu dutenez karrozaren gaia “Baserria” izango da.
Taldearen asmoa da urtean zehar egiten diren bi danborraden antolaketaz arduratzea. Horretarako, elkartea sortzea ezinbestekoa zuten eta elkartearen izena erabakitzeko orduan, “Tata” jartzea erabaki dute, Udaleko kultur teknikari Jesus Arrizabalagaren omenez, bere ezizena baita “Tata”. “Urte onetako eta txarretako danborraden atzean egon da beti Tata eta horregatik aukeratu dugu bere izena”, dio Inazio Odriozolak. Izen horren atzean, “auzolanean segituko dugu”, beste talde batzuen laguntzarekin, besteak beste, Txintxarri eta Umore Ona.

Suteak eragindako kalteen ondoren, parke estali lehengoratzeko lanak burutzeko, Udaleko Kontratazio Mahaiak Urbabil 2000 S.L. enpresak aurkeztutako proposamena onetsi du, esleipen prozesua ixteko izapide guztiak oraindik amaitu ez badira ere. Onetsitako eskaintzaren aurrekontua 129.702,08 eurokoa da, eta kontratua sinatzen denetik, bi hilabeteko epea izango du enpresak lanak burutzeko. Gastuak ordaintzeko Udalak 104.000,44 euro jasoko ditu aseguru-konpainiarengandik, gertaturikoa gertatuta, egindako erreklamazioen ostean.

Al Ar Az Og Or Lr Ig
3
4
5
31
© 2019 Azkoitiko Udala. Lege oharra