Berriak
Ipuin kontaketa musikatua, Aizkibel Liburutegian
Ipuin kontaketa musikatua eskainiko da Aizkibel Liburutegian, Amelie ipuin kontalariaren eskutik. Martxoaren 13an, asteazkenean izango da, 18:30ean. Ekimena haurrei zuzendua dago, zehazki, HH5, LH1, LH2 eta LH3 adin tarteko umeei. Izena liburutegian bertan eman daiteke edo 943 85 08 98 telefonora deituta. Bihar, martxoaren 12an, da izena emateko azken eguna.
Iraurgi Saskibaloi klubak Azkoitiko herria omendu du gaurko jardunaldian
Iraurgi Saskibaloi Klubak Azkoitiko herria omendu du gaurko jardunaldian, taldearen 50. urteurrenaren harira, eta aitortza ekitaldiak, ordezkari gisa, demokrazia garaian alkate izandakoak eta egungo alkatea bildu ditu. Roman Sudupe, Ramon Unanue, Nere Zubizarreta, Asier Aranbarri, Urrategi Alberdi, Javier Zubizarreta eta Ana Azkoitia elkartu dira Azkoitiko kiroldegiko kantxan. Pello Bastarrika alkate ohiak ezin izan du bertan egon. Momentua argazki batean hilezkortua geratu da.
Ikasleek moratu kolorez jantzi dituzte udaletxeko hormak Emakumeen Nazioarteko Egunean
Azkoitiko ikastetxeak kalera atera dira Emakumeen Nazioarteko Egunean. Gaur, aldarrikapen eguna da -urteko gainerako 364 egunak bezala- eta ikasleek muralen bidez ikusarazi eta azpimarratu nahi izan dute emakumeek gizarteari egiten dioten ekarpena.
Azkoitiko bost hezkuntza zentroek hartu dute parte. Xabier Munibe Ikastolak, Floreaga Ikastetxeak, Azkoitia BHI-k, Bizilore Eskola Aktiboak eta Izarraitz Lanbide Heziketak. Udal ordezkariak izan dituzte bidelagun.
Oharra: Toki Alai zubiko espaloia itxiko da datorren astean ur ihesa konpontzeko
Toki Alai zubiko espaloia, Julio Urkixo eta Juin kalearen arteko bidegurutzearen ondokoa, oinezkoentzat itxita egongo da datorren astean, astelehenetik ostegunera bitartean, hilaren 11tik 14ra, antzeman duten ur ihesa konpontzeko lanak burutu ahal izateko.
M8, Emakumeen Nazioarteko Eguna: Izan zirelako gara, garelako izango dira
M8, Emakumeen Nazioarteko Eguna dugu gaur. Azkoitiko Udalak ondorengo erakunde adierazpena onartu zuen otsaileko udal osoaren azken bilkuran:
Emakumeen nazioarteko egun honetan bidezkoa da gure gizarteak historian zehar eraldaketa feministak eragin dituzten emakumeen belaunaldiekiko zorra aitortzea, bai genero-agindu eta genero-estereotipoen aurkako erresistentzietan, bai mugimendu feministaren borroka kolektiboan.
Ana Azkoitia: “Aparkalekuen arazoari irtenbideak bilatzen saiatzen ari gara epe labur, ertain eta luzera”
Aparkaleku eza zenbait auzotako bizilagunen kexa nagusia bihurtu da. Horren aurrean, Udala irtenbideak bilatzen ari da epe labur, ertain eta luzera begira. Legealdi honetan hartutako erabakia izan da mugikortasun plana egitea espazioak ordenatzeko eta optimizatzeko, ez bakarrik aparkalekuak sortuz, baita oinezkoentzat eremuak eta gune berdeak eraikitzeko ere.
“Udalak – azaldu du Ana Azkoitia alkateak- planaren erredakzioa lizitaziora lehenbailehen aterako du, eta ikusiko dugu zeintzuk diren alternatibak. Aparkaleku ezak gehien eragiten dien auzoak, besteak beste, San Martin, Floreaga, Jausoro edota Baztarrikalde dira eta teknikoki arazoa arintzeko soluzioak aztertzen ari gara”. Gaur egun, Azkoitian, 11.737 biztanleko herrian, 6.146 auto eta 571 motor daude.
Gazteria sailak Pazko Oporraldirako lantegiak aurkeztu ditu
Aisialdiaz gozatu eta bidez batez, gustuko jardueretan trebatzeko, Gazteria sailak lantegi sorta zabala antolatu du Pazko Oporraldirako. Adin ezberdinei zuzenduta, besteak beste, sukaldaritza, arteterapia, kodeka teknologia, sormen tailerra, brinko proiektua, margoz lantegia edota makrame ikastaroa eskainiko dira.
Lantegietarako izen-ematea ostiralean, martxoaren 8an, zabalduko da, eta www.elkarguneazkoitia.eus atariaren bidez eman beharko da izena. Horretarako azken eguna martxoaren 20a izango da.
Urola Kosta eta Urola Erdiko lehen Lanbide Heziketa eta Enplegu Azoka egin da
Gaur Urola Kosta eta Urola Erdiko lehen Lanbide Heziketa eta Enplegu Azoka egin da Zarautzen, eta bertan parte hartu du Izarraitz Lanbide Heziketak. Halaber, Iraurgi Berritzeneko eta Urola Kostako Udal Elkarteko lehendariek, Ana Azkoitiak eta Ion Arozenak, bisitatu dute azoka beste hainbat udal ordezkarirekin batera.
Azoka Urola Kosta eta Urola Erdiko Lanbide Heziketako ikastetxeek, Garapen Agentziek eta Lanbide-Euskal Enplegu Zerbitzuak antolatu dute, elkarlanean, talentuaren sorrera, erakartzea eta mantentzea sustatzeko.
| Al | Ar | Az | Og | Or | Lr | Ig |
|---|---|---|---|---|---|---|
|
4
|
5
|
6
| ||||
|
11
|
12
|
13
| ||||
|
19
|
20
|
21
| ||||
|
25
|
26
|
27
| ||||
