Berriak
Udalak lau langabetu kontratatuko ditu, balio anitzeko peoi lanetarako
Azkoitiko Udalak langabezian dauden lau herritar kontratauko ditu, balio anitzeko peoi lanetan aritzeko. Bost hilabeterako kontratatuko ditu eta epe horretan lanaldi osoan arituko dira langileak, Udalaren ohiko ordutegian Honako baldintzak bete beharko dira lanpostu horietako hautagai izateko: Lanbiden izena emanda egotea, azken sei hilabeteetan Azkoitian erroldatuta egotea, 16 urte beteta izatea, gutxienez eskola graduatua edukitzea eta B mailako gidabaimena edukitzea. Langile horiek aukeratzeko prozesua gaur zabaldu da, eta interesa dutenek urriaren 18a baino lehen eman beharko dute izena Udaleko Erregistro Orokorrean. Lan eskaintzaren oinarriak hemen dituzue eta baita eskaera orria ere.
Berdintasun teknikari bat kontratatuko du Udalak
Udal Gobernuak eta Gipuzkoako Diputazioak lankidetza akordioa lortu dute, eta horri esker, Azkoitiko Udalak Berdintasun teknikari bat kontratatuko du urtea amaitzerako. Berdintasun teknikari horrek %75eko lanaldia izango du eta bere funtzioa izango da udaletik berdintasun politikak garatzea. Hilabete honetan bertan sinatu dute hitzarmena Udalak eta Diputazioak eta horri esker Foru Aldundiak diruz lagunduko du kontratazioa. Datozen asteetan teknikaria hautatzeko eta izendatzeko prozesua martxan jarriko du Udalak, zerbitzu hori lehenbailehen martxan jartzeko. Azkoitiko udalak apustu serioa egin nahi du emakume eta gizonentzat aukera berdinetan oinarritutako gizarte bat eraikitzeko. Udal eta erakundeok geure erantzukizunak hartu behar ditugu eta bitartekoak jarri behar ditugu berdintasun politikak garatzeko, indarkeria matxistari eta emakumeen bazterkeriari aurre egiteko eta emakumeen parte hartzea sustatzeko.
Ingurumena zaindu eta naturarekin elkarbizitzeko
Bost talde eragile, 19 ekitaldi, 15 egun eta helburu bat: ingurumenaren inguruko kontzientzia landu eta naturarekin elkarbizitzen ikastea. Zenbaki eta hitz horiekin dator aurtengo Ingurumen Hamabostaldia. Ume, gazte eta helduak, denak ditu jomugan hamabostaldiak, eta guztiak kontzientziatzeko egitaraua antolatzen saiatu da: "Eguneroko ohitura batzuk aldatu eta naturarekin elkarbizitzen ikasi eta erakutsi nahi dugu eta horretarako egin dugu ahalegina", hala adierazi du Inaxio Gorosabel Ingurumen zinegotziak. Hitzaldiak, jolasak, bizikleta martxa... ohiko ekimenek ez dute hutsik egingo, baina badaude berrikuntzak ere: aurreneko aldiz, eta 0 Zabor taldeak antolatuta, bigarren eskuko azoka egingo da larunbatean. Horrez gain, Zuhaitzat Bizirik taldea ere aurkeztuko da, eta Deba eta Zumaia arteko Flyshak ezagutzeko txalupa bidaia gidatua ere egingo da. Horrez gain, Ipintza eta Bizkargi inguruetan auzokonposta egiteko guneak zabaltzeko kanpaina ere zabalduko du Udalak. Etxaniz Autoeskola, 0 Zabor taldea, Oreka bioelkarteak, Barantza Dantzan Kontsumo taldeak eta Zuhaitzak bizirik taldeek eta Udalak elkarlanean antolatu dute hamabostaldia. Hemen duzue egitarau osoa
Plaza bete elkartasun
Joan da Garapenean Bidelagun aste solidarioa eta agerian utzi du Azkoitia elkartasun herria dela. Herritar asko izan dira aste horren baitan egindako ekitaldietan parte hartu dutenak, bai Fiare banku etikoaren inguruko hitzaldian eta batez ere larunbat goizean egindako ekimenetan: Gobernuz Kanpoko Erakundeek hartu zuten herriko plaza eta azkoitiar ugari gerturatu zen euren lana ezagutu eta bakoitzak ahal duen neurriko ekarpena egitera. Eguneko unerik hunkigarriena eguerdian hasi zen: kolore, adin, jatorri eta izaera ezberdineko azkoitiarrek Iparra-Hegoa harremanean oinarritutako poema, kantu, testu, bertso eta esaldiak irakurri zituzten, ordu eta erdi inguruan, mundu justu eta solidarioago baten aldeko aldarria ozen zabalduz. Argazkiak, hemen.
Bihar irekiko da haurreskolan matrikulatzeko epea
Xabier Munibe haurreskolan bihar (urriak 1) hasiko da matrikulazio kanpaina: etxeko txikiak bertara eraman nahi dituztenek bihartik urriaren 31ra bitartean eman beharko dute izena. Eta haurreskola bertatik bertara eta egokiago ezagutzeko ate irekien saioa egingo dute larunbatean (urriak 5), 11:00etan hasita. Gerturatu eta bertatik bertara haurreskola ezagutzera animatzeb ditu herritarrak Xabier Munibe haurreskolak.
Abuztuan %15,20 langabezia tasa izan da Azkoitian
Bizenta Mogel ipuin lehiaketa martxan da
Bizenta Mogel euskarazko ipuin lehiaketa martxan da jada. 18 urtetik gorakoek hartu ahal izango dute parte bertan, eta gutxienez lau eta gehienez hamar orriko lanak aurkeztu beharko dituzte. Lanak aurkezteko azken eguna urriaren 31 da, eta irabazlearen izena azaroaren 29an ezagutuko da. Hiru sari emango dira: irabazleak 500 euro eta oroigarria jasoko ditu, bigarrenak 330 euro eta oroigarria eta hirugarrenak 200 euro eta oroigarria. Hemen lehiaketare oinarriak
Euskara ikasteko bekak eskatzeko epeak zabalik daude
Azkoitiko Udalak euskara ikasi nahi dutenei eskaintzen dizkien diru-laguntzak eskatu daitezke jada. 2012-2013 ikasturteko bekak eskatzeko epea irailaren 30ean amaitzen da eta aurtengo ikasturterako, berriz, urriaren 22ra bitarten eskatu daitezke. Eskaera udaletxean egin behar da eta oinarriak eta informazio osoa bertako harreran edo udal webgunean dago eskuragai.
Diru laguntzetan aldaketak izan dira aurtengo ikasturtean. Orain arte, bekak ikasturtea amaitu ostean ematen zituen Udalak, baina hemendik aurrera, ikasturte hasieran emango ditu laguntzak, herritarrek ikasturtea ordaintzerakoan zailtasunik izan ez dezaten.
| Al | Ar | Az | Og | Or | Lr | Ig |
|---|---|---|---|---|---|---|
|
1
|
2
|
3
| ||||
|
4
|
5
|
6
|
7
| |||
|
11
|
12
|
13
|
14
|
15
| ||
|
19
|
20
|
21
|
22
| |||
|
26
|
27
|
28
|
29
| |||
