tramiteak-img.jpg

Aurrera doaz Zalduntxoen kalean eta Beidazarko aldapan egiten ari diren lanak. Udala hainbat hobekuntza egiten ari da, zonalde berean 2019an egindako obrei jarraipena emanez. Orduan Ertzaintzaren eraikina inguratzen duen espaloia berritu zen eta baita Zalduntxoen kalea 4 zenbaki pareko espaloia ere. Horretaz gain, saneamenduko ur azpiegiturak berritu ziren. Orain esku hartzen ari dira Zalduntxoen kaleko 1, 2 eta 3 zenbakietan eta Beidazarko aldapan.

Eskolako Agenda 2030 egitasmoaren baitan, gaur udalbatzarreko protagonista ikasleak izan dira. Aurtengo ikasturtean lehorreko ekosistemetako bizia jorratu dute eta gai oso zabala denez, basoen inguruan aritu dira. Javier Zubizarreta alkateak eta Imanol Arrizabalaga zinegotziak egin diete harrera eta gaztetxoek hartutako konpromisoak azaltzeaz gain, basoen, mendien eta zuhaitzen zainketarako hainbat proposamen egin dizkiete udal ordezkariei.

Udaberriko Musikaldiak proposamen berriekin jarraitzen du, zikloaren erdia igaro den honetan. Datorren igandean, maiatzaren 23an, Vocalia Taldea emakumeen abesbatza izango da Parrokian, Udaberriko Musikaldiaren baitan. Basilio Astulezen zuzendaritzapean, publikoa ukituko duen errepertorioa interpretatuko du taldeak. Hitzordua 18:30ean izango da. Sarrera doan da.

Udalak Gizarte Larrialdiko harrera-etxebizitzaren erabilera eta sarbidea arautzen dituen ordenantza eguneratuko du aurrekoa zaharkituta geratu delako eta ez dituelako jasotzen gaur egun eman daitezkeen erabilera anitzak. Ordenantza berria indarrean jarri aurretik, herritarren ekarpenak jaso ahal izateko, kontsulta publikoa ireki du. Ekarpenak egiteko 20 laneguneko epea dago, beraz, ekainaren 16an itziko da kontsulta. 

Jaitsi hemen ordenantza eguneratzeko aurretiko kontsulta jasotzen duen txosten teknikoa (pdf)

 

 

Naizen adin txikiko transexualen familiak biltzen dituen elkarteari laguntzeko azoka solidarioa antolatu dute Abarketatxo Ludotekako eta Artxamendi Topalekuko haur eta gaztetxoek. Ludotekaren “Enea Zurea” proiektuaren baitan gauzatu dute ekimena. Programaren helburua praktika onak sustatzea da.
Azokaren azken eguna biharkoa, osteguna, izango da. Gaur eta bihar bisita daiteke. Zabalik egongo da ludotekan 17:00etatik 19:00etara. Bertan haurrek egindako eskulanak eta Naizen elkartearen kamisetak erosi ahalko dira.

Ekin zaie Floreagako irisgarritasuna hobetzeko lehenengo faseko lanei. Atzo bertan jarri zituzten obretako kasetak eta gaur sartu dira hondeatzaile edo lehenengo makinak. Hiru bat hilabeteko iraupena izango dute lanek aurreikusitakoaren arabera. Asmoa da abuztu erdirako amaituta egotea. Hain justu, lanak atzeratzea erabaki zen ahalik eta gutxien kointziditzeko denboran eskola-umeen ikasturtearekin, ikasleen joan-etorri handiko gunea delako.

Udalak berrogeitaka aparkaleku egokitu ditu San Martinen, berotegi zaharrak zeuden tokian, hain justu. Lursaila pribatua izaki, Udalak lagatze hitzarmena adostu behar izan du jabeekin gunearen erabilpenerako eta behin akordioa itxita, Udala lurzorua egokitzeaz arduratu da. Lur begetala kendu eta hartxintxarra edo harrobiko betegarria bota da, autoak sartu ahal izateko. Hori bai, bertan aurreikusita dago garapen urbanistikoa eta beraz, aparkalekuak behin behinekoak dira. Eraikuntza enpresa batek etxebizitzak eraikitzen hastea erabakitzen duen artean egongo dira aparkalekuak erabilgarri.

Ttipi Ttapa programaren baitan uda aurretik antolatu diren hiru saioetatik, azkena egingo da maiatzaren 27an. Herritarren erantzuna ikusteko esperientzia pilotu gisa antolatu dira eta asmoa da irailean berriro ibilaldiekin hastea.
Hilaren 27an parte hartzeko izen-ematea zabalik dago. Izan ere, irteerak ostegunetan direnez, aurreko astelehena bitartean eman daiteke izena.

© 2019 Azkoitiko Udala. Lege oharra