Berriak
Aittolako parkean zaborra behar bezala jasotzeko eskatzen die Udalak herritarrei
Arbolape bat zaborrez beteta agertu da asteburuan Aittolan. Hara joandako hainbat herritarrek sortutako hondakinak bertan uztea erabaki dute, nonbait. Jarrera hori salatu eta hondakinak Otarre pareko edukiontzietara eramateko eskatu nahi die Udalak herritarrei. Ingurumena zaintzea guztion ardura eta erantzukizuna da eta gizalegez jokatzea ezinbestekoa da gure parajeak behar bezala mantentzeko.
Merkataritzaren tendentzia berriak ezagutzeko ikastaroa emango dute sektorearentzat
Bailarako merkatariei zuzendutako jardunaldi berezia antolatu dute Iraurgi Lantzen, Loiola Berrikuntza, Herrixen, Bertan eta Elkarmedia eta Eusko Jaurlaritzaren merkataritza dinamizatzeko bulegoak. Ikusmer merkataritza behatokiak emango du jardunaldia, eta bertan merkataritzaren azken tendentziak aztertuko dituzte, halanola: qr kodigoak, merkataritza bidimensional eta adimensionala edo sakeleko bidezko salerosketa. Horren ondoren, Elkarmediak merkatari txikientzat erabilgarria izan daitekeen aplikazio erreal bat ere aurkeztuko du. Jardunaldia uztailaren 10ean izango da, eta Azpeitiko Sindikatu Zaharrean, 14:30etik 16:30era. Parte hartu nahi dutenek aurretik eman behar dute izena, Iraurgi Lantzen (943 85 11 00), Herrixen (608 31 30 24), edo Bertanen 943 02 56 73. Ezinbestekoa da izena aurretik ematea.
Azkoitiko enpresetan euskara plana sustatzeko diru-laguntzak emango ditu Udalak
Lan munduan euskara sustatzen segitzeko beste pausu bat eman du Udalak: Azkoitiko enpresetan euskara planak bultzatzeko diru-laguntzak emango ditu. Iaz Serbitzu Elkartea eta Biharko Gipuzkoa enpreseekin hitzarmenak sinatu zituen Udalak enpresa horiek martxan jarri zituzten euskara planak laguntzeko, eta laguntza hori orain ofizialki zabaltzea onartu du. Izan ere, Udalak argi du lan mundua euskalduntzeko ahalegin berezia egin behar dela: egun Azkoitiko enpresetan euskara da nagusi ahozko komunikazio eta harreman informaletan, baina idatzizkoan eta komunikazio formalean gaztelera erabiltzen da gehien. Horri buelta emateko eta hezkuntzan emandako pausuek lan munduan ere isla izan dezaten euskara planak erreminta eraginkorrak direla uste du Udalak eta horregatik egin du ahalegina.
2013ko Andramaixetarako herritarren proposamen eta ekarmenak jaso nahi ditu Udalak
Uztaila iristear da eta dagoeneko ari da sumatzen festa usaina. Gero eta gertuago daude 2013ko Andramaixek eta Udala ari da jada festen inguruan lanean. Festa herrikoietan sinesten du, azkoitiarrek parte hartu, bizi eta gozatzeko moduko festetan, eta horregatik legegintzaldia hasi zenetik jaietan herriko talde eta herritarrak inplikatzeko ahaleginetan ari da. Eta horretarako bide berri bat ireki du aurten: gaurtik uztailaren 10era bitartean, azkoitiarren iritzia jasotzeko galdetegi bat jarri da udal webgunean eta baita herriko gune esanguratsuenetan ere, azkoitiarren iritzia ekarpenak jasotzeko.Horrez gain, herriko talde eta elkarteekin bilera bat ere egingo da, haien parte hartzea indartzeko zer egin aztertzeko. Bilera uztailaren 10ean izango da Elkargunean, arratsaldeko 18:30ean.
Laburmetrai lehiaketa: indartuagoa eta zabalagoa
Badator Andramaixetako III. laburmetrai lehiaketa. Eta indartuago eta zabalagoa dator gainera aurten, berrikuntzekin: bi sari egongo dira, bata aditu talde batek emandakoa, eta bestea publikoarena, 600 eta 200 eurokoak, hurrenez hurren. Eta horrez gain, deialdia Azkoititik kanpora zabaltzeko ahalegin berezia egingo da. Gaia, honakoa: zurrumurruak, jarduna, paolak, txutxumutxuak... Lanak entregatzeko azkeneko eguna abuztuaren 6a izango da. Hemen dituzue lehiaketaren oinarriak.
Gay, Lesbiana eta Transexualen Eskubideen Nazioarteko egunarekin bat
Gaur, ekainak 28, Gay, Lesbiana eta Transexualen Eskubideen Nazioarteko Eguna da eta egun horrekin bat egin du Azkoitiko Udalak. Horregatik, hiruki arrosa ezarri du udaletxeko balkoian, EHGAM Euskal Herriko Gay-Les Askapenerako Mugimenduak proposatuta. Hiruki Arrosa naziek erabili zuten homosexualak bereizteko konzentrazio eremuetan eta gaur egun sarraski hura gogoratu eta oraindik bete gabe dauden gay, lesbiana eta transexualen eskubideak aldarrikatzeko erabiltzen da.
Festetarako zure proposamenak entzun nahi ditugu
Udarekin batera Andramaixek gerturatzen hasi dira eta Udalean hasi gara festetako egitaraua prestatzen. Festa herrikoi, parte hartzaile eta anitzen aldeko apustua egin nahi dugu 2013an ere, eta horretarako azkoitiarron iritzi, proposamen eta ekarpenak entzun nahi ditugu. Zure iritzia jakin nahi dugu, zure proposamenak entzun, eta zure ideiak jaso, eskaintzeko eta emateko asko duzula sinesten dugulako.
Horregatik, eskertuko genizuke honako galderei erantzutea:
- Aurtengora begira, nola indartuko zenuke parte hartze hori?
- 2013ko Andramaixetarako ideia edo proposamen zehatzik baduzu?
Bidali zure erantzunak Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera, gustura jasoko ditugu.
Animatu eta parte hartu!!
Musika gune bateratu bat egingo du Udalak Elkargunean, herriko taldeekin adostuta
Elkargune musikala proiektua martxan da. Azken urteotan Azkoitian musika talde eta elkarteen beharrak asetzera datorren proiektua da, talde eta eragileekin elkarlanean landu eta diseinatutakoa, azkoitiarren beharrei erantzun eta herriko azpiegitura hobeto aprobetxatuko dituena. Horretarako, Elkargunearen azpilaldean dagoen lokal handia egokitu egingo da, eta bertako beste lau lokal insonorizatuko dira. Musika eskola, herriko banda, eta herriko musika taldeekin elkarlanean ari dira proiektua lantzen, eta 2014ko abendurako amaituta izatea espero da.
| Al | Ar | Az | Og | Or | Lr | Ig |
|---|---|---|---|---|---|---|
|
3
|
4
|
5
| ||||
|
29
| ||||||
|
30
|
31
| |||||
