Martirietako bidea zabalik dago jada. Urte hasieran luiziak emandako errepidea berreraikitzeko lana handienak amaitu ditu Foru Aldundiak, eta gaurtik erabiltzeko moduan da bidea. Halere, lanak ez dira guztiz amaitu: errepidea egokituta dago, baina azkeneko asfaltu geruza botatzea falta da eta lurrak egonkortzeko lanak ez dira guztiz bukatu. Horregati, behin behinekoz irekitzea erabaki da, betiere dagokion segurtasun neurri guztiak hartuta: eusteko elementu batzuk jarri dira eta abiadura mugatu egingo da obrek hartzen duten zatian.

Lan orientatzaileak kontratatzeko deialdia atera du Iraurgi Berritzenek: bi lanpostu izango dira, irailetik aurrera lanean hastekoak. Bi pertsona horiek lan orientazio zerbitzuan eta enplegu zentroan enplegu eskatzaileei harrera egiteko dira. Bete beharreko ezinbesteko baldintzak, berriz, honakoak dira: bukatutako goi-maila edo erdi-mailako unibetsitateko ikasketak izatea, humanitate arloarekin lotutakoak. Lan-orientatzaile bezala gutxienik urtebeteko esperientzia izatea eta ofimatika, internet eta lan-merkatuaren ezagutzea. Interesatuek datorren astean eman beharko dute izena, Lanbiden. Hemen duzue erreferentzia.

Iraurgi Lantzen, Ezagutza Gunea eta Loiola Berrikuntza Azkoitia eta Azpeitiako Udalek bailarako garapen sozioekonomikoa lantzeko dituen hiru erakunde dira. Orain arte, bakoitza garapenaren arlo batzuk lantzen aritu da, norbera bere aldetik. "Horrek duplizidadeak sortzen zituela ikusi dugu; horrez gain, hainbeste eragilerekin herritarren artean nahasmen apur bat bazegoela ere somatu dugu, eta udalok geuk garapen arloan egiten ditugun beste kontuekin talka batzuk ere sortzen direla ere bai", hala adierazi du Pello Bastarrika alkateak. Horri buelta eman eta baliabideak optimizatu, koordinazioa hobetu eta indarrak norabide berean hobeto kontzentratzeko, hiru eragileak erakunde bakar batean batzea erabaki dute. Horrela sortu da Iraurgi Berritzen, Urola Erdiaren garapenerako erakunde bateratua.

 

Azkoitiko Udalak berriz ekin dio erakusleiho lehiaketari."Kale Nagusia: merkatal bizitzara begira dagoen leihoa" lemapean, Kale Nagusian dauden lokaletako erakusleihoak modu erakargarrian apaintzea du helburu eta Azkoitiko alde historikoari duintasuna eta bizitasuna ematea. Lehiaketa honek 2.000 euroko saria izango du, eta parte hartzaileek honakoa aurkeztu beharko dute: dagoeneko zehaztuta dauden bost eskaparate apaintzeko proiektu bat. Oinarrietan daude zehaztuta aurkeztu beharreko lanen nondik norakoak. Lanak aurkezteko epea gaur (uztailak 15) zabaldu da eta irailaren 13ra bitartean egongo da zabalik. Lanak Torre Zurin jarriko dira ikusgai, herritarren ere euren gogokoenari botoa emateko modua izateko. Informazio gehiagorako deitu honako telefonora: 943 85 71 70.

 

Aizkibel liburutegiak herritarrekin elkarlanean antolatutako ipuin kontaketen beste bi saio izango dira aste honetan. Bihar (asteartea), Ana Albizurik 3, 4 eta 5 urteko haurrentzat ipuinak kontatuko ditu, 18:00etan hasita. Ostegunean, berriz, Nerea Astigarraga izango da kontalari, "Cuentos para sentir" liburua oinarri hartuta, hori ere 18:00etan. Albizuri eta Astigarraga azkoitiarrak dira biak.

 

Andramaixetako kartela aukeratzeko bozketa asteburuan izango da, Torre Zurin. Bihartik aurrera, larunbatean eta igandean, azkoitiarrek gustukoen duten kartelari botoa emateko aukera izango dute, 12:00etatik 15:00etara eta 17:00etatik 20:00etara. Herritarrez gain, adituen epaimahai batek ere baloratuko ditu lanak, eta balorazio guztiak kontuan hartuta, datorren astean aukeratuko da 2103ko Andramaixetako kartela. Guztira 14 lan aurkeztu dira aurtengo kartel lehiaketara, eta guztiak egongo dira ikusgai Torre Zurin.

2013ko Andramaixek parte hartzaileagoak nola egin. Horren inguruan hausnartu zuten atzo herriko hainbat talde eta elkarteetako 20 bat herritarrek. Bereziki, haur eta gazteen parte hartzea nola indartu eta 18ko herri bazkariaren osteko giroa nola indartu aztertu zuten. Taldeka jarrita, ideia ugari bota zituzten herritarrek, eta horietatik interesgarrienak aukeratu zituzten. Besteak beste, honako ideiak agertu ziren: haur eta gurasoen arteko bazkaria eta jolasak antolatzea, koadrillen kamixeta lehiaketa bat egitea, txaranga eta 'ure-ure' ekimena berreskuratzea...

 

Auzokonposta egiteko liburutegi inguruko gunea handitu egin du mankomunitateak, eta horri esker, hirugarren talde bat hasi da auzokonposta egiten. Hirugarren talde horretako herritarrek asteartean jaso zituzten beharrezko materialak eta ikastaroa, eta hasi dira egiten batzuk. Horrez gain, autokonpostagailu gehiago ere banatu ziren astearteko bilera horretan, euren lorategi edo zelaian autokonposta egitea erabaki duten azkoitiarrak ere gero eta gehiago direlako.
Al Ar Az Og Or Lr Ig
3
4
5
29
30
31
© 2019 Azkoitiko Udala. Lege oharra