Berriak
Xabier Munibe Haurreskolak urriaren 3tik 10era zabalduko du matrikula epea
Xabier Munibe Haurreskolak urriaren 3tik 10era, biak barne, zabalduko du matrikula epea azarotik urtarrilera bitartean hasi nahi duten haurrentzat. Haurra matrikulatzeko jaiota egotea beharrezkoa da eta ikasturtea hasteko gutxienez 16 aste izan behar ditu. Halaber, urriaren 5ean Ate Irekiak egingo dira, arratsaldeko 18:00etan.
Matrikulako inprimakiak jasotzeko edota informazio osagarria jasotzeko, Auzmendi bidean daude edota 943 08 07 37 telefonoan.
Iraileko ohiko bilkuraren gai zerrenda
Bihar, irailak 28, 19:00etan egingo den ohiko udal bilkuraren gai zerrenda:
1.-Aurreko bilkuretako akten onespena, hala badagokio.
2.- Miguel Reimundez Milan J.-k aurkeztutako zinegotzi karguari uko egitearen berri ematea.
3.- Behin betiko onespenen berri ematea.
4.- Aurrekontuari buruzko informazioa.
5.- Galde-erreguak.
Errefuxiatuen errealitatea gerturatuko du irailaren 27tik urriaren 1era egingo den Aste Solidarioak
Hausnarketara eta kontzientziak astintzera animatzen du Garapenean Bidelagun lelopean egingo den Aste Solidarioak. Irailaren 27tik urriaren 1era egingo da aurtengo edizioa, garapen bidean dauden herrialdeen alde lanean ari diren bederatzi elkarte edo Gobernuz Kanpoko Erakundeen (GKE) parte hartzeari eta ekarpenari esker.
GKEen lana azaleratzen eta herritarrak sentsibilizatzen laguntzen du Aste Solidarioak, herriaren aurpegi solidarioena agerian jarriz. Horretarako, elkarteek postuak jartzen dituzte Herriko Plazan eta aurten ere horrela egingo dute Urriaren 1ean, larunbata, goizeko 11:00etatik 14:00etara egongo dira hurbiltzen den orori egiten dutenaren berri emateko.
Udalak eta Idiakez Etxearen jabeek eraikina Udalaren esku uztea hitzartu dute
Idiakez Etxearen jabeek eraikinaren jabetza Udalaren eskuetara pasatzeko konpromisoa berresten duen lankidetza hitzarmena sinatu dute gaur udaletxean. Agenda kontuengatik data ezberdinak ezarri dira etxejabeek dokumentua sinatzeko. Lehenengoak Lizarralde familia eta Santa Klara komentuko mojak izan dira, titulartasunaren %40aren ordezkaritza dutelarik bien artean. Gainontzekoek, geratzen diren hiru familien ordezkariek, datorren astean sinatuko dute hitzarmena.
Negoziazioak bi norabidetan doaz aurrera. Batetik, hitzarmenarekin etxejabeek eraikina Udalari emateko adostasuna adierazi dute, Udalak azken urteetan jasandako mantenimendu gastuen truke. Bestetik, espero da VISESAren administrazio kontseiluak hilabete honen amaieran izenpetuko duela Azkoitiko Udalarekin hitzez duen kolaborazio akordioa. Hitzarmen horren arabera, VISESAk Babes Ofizialeko etxebizitzak eraikiko ditu Idiakez Etxean. Horrela, konponezina zirudienari soluziobidea ematen ari zaio Udala, aurretik alde guztiak etsita zeudenean.
Hizkuntza Eskolaren gela desplazatuetan 84 lagunek ekingo diote ikasturteari datorren astean
Instalazioetara bisita egin dute udal ordezkariek bertan egindako lanak gainbegiratu eta dena prest dagoen ikusteko
Datorren astean emango diote hasiera ikasturteari Hizkuntza Eskola Ofizialaren Azkoitiko gela desplazatuetan onartuak izan diren 84 ikasleek eta gaur udal arduradunek bisita egin dute instalazioetara dena prest dagoen gainbegiratzeko, gunea egokitzeko obrak egin baitira bertan, 110.000 euroko aurrekontuarekin. Harreran egongo den pertsona bat ere kontratatu du Udalak.
Aurreikusitako moduan, hiru talde osatu dira eta bakoitzean 28 ikasle arituko dira. B1.1, B1.2 (PET) eta B2 (FIRST) mailetako ikasketak egingo dituzte. Oraingoz, eskaintza ingelesera mugatu da baina aurrera begira litekeena da hizkuntza eskaintza gehitzea edota ordutegiak zabaltzea. “Udalaren lehentasuna zen Hizkuntza Eskolaren gela desplazatuak Azkoitian martxan jartzea eta akordio horretara heldu ginen Eusko Jaurlaritzako Hezkuntza sailarekin. Azkoitia da gela desplazatuak zabaldu diren herri bakarra eta Hezkuntza sailak esan du ez duela aurreikusten beste inon eskola berririk zabaltzea. Beraz, lortutakoa ez da gutxi. Behin gelak martxan jarrita, irekita dugu eskaintza zabaltzen joateko aukera eta guk horretan lanean jarraituko dugu”, esan du Nekane Larrañaga Hezkuntza zinegotziak.
Abian dira berriz Emakumeon Ahalduntze Ikastaroak
Beste behin Udalak Emakumeok ahalduntzeko ikastaroak antolatu ditu urrian hasi eta abendua bitartean. Lau ikastarok osatzen dute eskaintza eta izena emateko epea irailaren 30ean amaituko da.
Ikastaroen xedea da emakumeen topaleku bihurtzea, kezkak eta interesak partekatzeko eta errealitate pertsonal, sozial eta politikoari buruz hausnartzeko.
Dantza, batukada, autodefentsa edota nor bere burua ezagutzen eta maitatzen ikasteko ikastaroak antolatu ditu Berdintasun sailak.
Ikastaro sortari batukada saioak emango dio hasiera urriak 5ean, Ainara Sarasketa eta Arantxa Vicedo irakasleen eskutik.
