Gaur, San Isidro egunean, Madariagako eliza inauguratu dute eraberritze lanak burutu ostean. Jendetza bertaratu da ikusminez, eta ermita bete-bete egin da. Felix Azurmendi erretoreak eta Sonia Sanz zaharberritzaileak hartu dute hitza lanen nondik-norakoak azaltzeko, eta lanak diruz lagundu dituztenei eta lanean aritu diren boluntarioei eskerrak eman dizkiete. Ondoren, Juan Maria Uriarte gotzai emerituak eman du meza eta prozesioa ere egin dute. Festa giroa izan da nagusi goizean Madariagan.

Tags:

Udalak lizitaziora atera ditu Floreaga auzoan bigarren igogailua jartzeko obrak, auzoko irisgarritasuna hobetzeko garatzen ari den proiektuaren bigarren fasea exekutatzeko, alegia. Lizitazioaren hasierako aurrekontua 805.641,03 eurokoa da (BEZ barne). Eskaintzak aurkezteko epea ekainaren 7an amaituko da.
Lehenengo faseak bezala, oraingo proposamenak igogailu bat, bi pasabide eta urbanizatze lanak aurreikusten ditu. Bigarren faseko igogailua Aizkibel kalea eta Zuazola kalearen arteko bidegurutzean kokatuko da, eta pasabideez baliatuz, Zuazola plazara eta Floreaga plazara iritsi ahalko da.

Egun hauetan hastear dira esku-hartze eremuetako bizilagunei eragozpenak eragin diezazkien hainbat hirigintza-lan. Datorren astelehenean hasiko dira Julio Urkixo eta Xabier Munibe kaleetako asfaltatze lanak. Zorua asfaltatzen hasi baino lehen, aurrelanak egingo dituzte arekatan. Denera bizpahiru aste iraungo dute lanek, aurreikuspenen arabera, baina obrek irauten duten bitartean, trabak sor daitezke. Edonola ere, une oro, eragozpenak minimizatzen eta saihesten ahaleginduko dira arduradunak.
Halaber, Ibaiondo kalean, anbulatorio ondoan justu, etxebizitza promozio berri bat altxako du Amenabar enpresak eta martxan ditu jada lanak. Esku-hartze horrek ere trabak eragin ditzake.

Larunbatean, hilaren 14an, 12:30ean, Udal Musika Bandak Candido Beristain zenaren omenezko kontzertua eskainiko du Kontzejupean, haren jaiotzaren mendeurrena ospatzeko. Bandak Txalkor Txistulari Taldearekin eta Irargi Abesbatzarekin batera emango du kontzertua.
Beristainek konposatutako obrak entzun ahalko dira larunbateko emanaldian. Halaber, Udal Musika Bandak bere eguna, Bandaren Eguna, ospatuko du.

Tags: ,

Azkoitiko Udala Atzegizalea da. Parte hartuko du Atzegik, adimen desgaitasuna duten pertsonen eta haien familien elkarteak, aurten abian duen sentsibilizazio kanpainan. Datozen egunetan, “Udal hau Atzegizalea da. Eta zu?” leloa daraman murala egongo da zintzilikatuta udaletxeko fatxadan.
Kanpainaren berri ematen izan dira udaletxean Atzegiko ordezkaria den Santos Uria eta bere semea, Lander Uria. Javier Zubizarreta alkatearekin eta Ongizateko zinegotzi Janire Igoarekin elkartu dira, eta adimen desgaitasuna duten pertsonen laneratzea bultzatzen duen “Pauso Berriak” programari esker, Udalean lan egiten duen Ander Idoeta izan dute bidelagun. Bisitan solas ederrean aritu dira Uriatar aita-semeak udal ordezkariekin.

Iraurgi Berritzeneko Enplegu arlotik, maiatzaren 16tik 24ra Bidelan programa garatuko da, bereziki emakumeei zuzenduta. 9:15etik 12:15era izango da Intsausti Jauregiko 1. go solairuan. Coaching teknika erabiliz, ariketa ezberdinak egingo dira partaideen gaitasun pertsonalak eta profesionalak lantzeko. Bestalde, eskualdeko sektore ezberdineko profesionalen bisitak ere izango dira bertan (Ekintzailetza, Industria, Zerbitzuak eta Menpekotasuna - 3. adina) eta bakoitzak bere alorreko prestakuntza eta enplegu eskaintzak azalduko ditu.
Programan parte hartzeko interesatuta dauden pertsonek, informazio gehiago lortu dezakete 688 873 589 telefonora deituz (Sandra).

30. Udaberriko Musikaldia zikloaren bigarren kontzertua eskainiko da larunbatean, maiatzaren 14ean, Santa Kutz Komentuan, 18:30ean. Arantza Ezenarro sopranoak eta Borja Rubiños pianistak hartuko dute oholtza oraingoan.
Bikoteak, besteak beste, Alessandro Scarlatti, Giuseppe Giordani, José Gonzalo Zulaika- Aita Donostia edota Francisco de Madina Igarzabal-Aita Madina konpositoreen obrak eskainiko ditu.

Igandean, Madariaga auzoan, San Isidroak ospatuko dira, “Madarixako Eguna”. Bertara joan nahi dutenek autobus zebitzua izango dute. Autobusa joan-etorrian ibiliko da goizeko 10:00etatik aurrea. Julio Urkixo kaleko geralekutik, Consum aurretik aterako da autobusa. Bueltako azken autobusa 14:00etan aterako da Madariagatik.

Tags: ,

Al Ar Az Og Or Lr Ig
3
4
5
31
© 2019 Azkoitiko Udala. Lege oharra