GI-631 errepidean, Azkoitia eta Urretxu artean, egiten ari diren lanak tarteko, leherketak egin beharra dauzkate eta puntualki horretarako errepidea mozten dute. Atzo eguerdiko leherketez geroztik, errepidea itxita dago. Gunea oso bertikala izanik, harri handiak erori ziren errepidera eta bideko garbitze lanak burutu bitartean itxita egongo da. Edonola ere, aurreikusten da goizean zehar zabalduko dutela.
Leherketen eta errepide mozketen inguruko informazioa jaso nahi baduzu whatsapp bidez, idatzi ondorengo telefono zenbakira taldera atxikitzeko eskatuz: 672690564

Tags:

Azaroaren 25ean izango da lehenengo irteera

Udalak uda aurretik eta esperientzia pilotu gisa Ttipi Ttapa proiektua jarri zuen martxan. Egitasmoaren helburua da pertsonak, bereziki adinekoak direnak, jarduera fisikoa praktikatzera animatzea eta bide batez, sozializatzen laguntzea une atsegin bat partekatuz. Laburbilduz, begiraleek lagunduta, taldean paseatzera ateratzea da egiten den proposamena. Izandako harrera ikusita, Udalak, Kirol Orientazio Zerbitzuaren bidez, proiektua berrartzeari ekin dio Izarraitz Lanbide Heziketarekin, Plaza Ondo Jubilatuen Elkartearekin, Azkoitia Lagunkoiarekin, Caritasekin eta Gurutze Gorriarekin lankidetzan.

Covidaren zabalkundea saihesteko atzo Osasun sailburu Gotzone Sagarduik emandako jarraibideen harira, Udalak Bozeramaile Batzordea deitzea erabaki zuen larunbateko danborradarekin eta San Andres jaiekin aurrera jarraitu ala ez adosteko. Udalean ordezkaritza duten lau alderdien bozeramaileek hartu dute parte Javier Zubizarreta alkatearekin batera eta danborrada egitea adostu dute. Hori bai, partaide guztiei eta herritarrei maskararen erabilerarekin zorrotz jokatzeko eskatu diete, gainerako neurriak betetzearekin batera.

Tags: ,

Udalak uda aurretik jarri zuen martxan Herrilab+700 parte-hartze prozesua herritarrekin, elkarteekin eta eragileekin herriaren egungo eta etorkizunaren inguruko hausnarketa partekatua egiteko. Ordutik, arloka 16 lan saio egin dira guztira, udal ordezkariekin eta udal langileekin hasi, eta eremu ezberdinetako taldeekin, eragileekin eta gizabanakoekin jarraituz. Diagnostiko fasea ixteko larunbatean, azaroaren 20an, azken lan saioa egingo da Elkargunean eta Udalak parte hartzera animatu nahi ditu herritarrak, elkarteak eta eragileak. Lan saioa goizeko 10:00etan izango da. 10:30ean egitea aurreikusita zegoen, baina azkenean, ordu erdi aurreratu da.

Gaur, San Martin eguna izanik, asko izan dira San Martinera igo direnak kanpaia jotzera. Lainoen konjuruen erritoaren izenean, goizean zehar ederki astindu dituzte kanpaiak eta isiluneak esku bateko behatzekin kontatzekoak izan dira.
Eskoletatik aterata, umeek txangoa egin dute ermitara beste hainbat herritarrek bezala. Javier Zubizarreta alkateak ere usadioari eutsi nahi izan dio eta, Ana Azkoitia zinegotziak lagunduta, izan da San Martinen. “Egun polita izaten da gaurkoa”, alkatearen hitzetan.

Datorren astean, azaroaren 19an, ipuin kontaketa saioa eskainiko da Aizkibel Liburutegian. Hitzordua 17:30ean izango da.
Lupe Lekuona izango da ipuin kontalaria eta itsasoko ipuinekin etorriko da oraingoan Azkoitira.
Saioa HH5, LH1, LH2 eta LH3ko haurrei zuzenduta dago. Saioa doan da baina plaza mugatuak direnez, izena ematea eskatzen da liburutegian bertan edo 943 85 08 98 telefonora deituta.

Udal ordezkariek eta ekitaldira batu diren hainbat herritarrek bost minutuko isilunea egin dute gaur eguerdiko 12:00etan Memoriaren Eguna ospatzeko.
Intsausti Jauregi aurrean elkartu dira, “Oroimenean” eskulturaren ondoan, herriko biktima guztiak oroitzeko.
Isilunearen ostean, Javier Zubizarreta alkatearen eskutik, lore eskaintza egin dute biktimen omenez.

Jarduera Fisikoko Orientazio Zerbitzua, Mugi Azkoitia, 2020ko urtarrilean jarri zen martxan, Udala Mugiment-era atxikitzearekin batera. Mugiment gizarte aktiboa lortzea xede duen elkarlanerako egitasmoa da, eta ehun erakundek hartzen dute parte. Ordutik, Mugi Azkoitia bere bidea egiten joan da, pandemiak gehiegi lagundu ez duen arren. Orain indarberrituta dator “inaktiboak diren pertsonei euren egunerokotasunean jarduera fisikoa txertatzen laguntzeko”, Sonia Vazquez zinegotziak azaldu duen moduan.

Al Ar Az Og Or Lr Ig
2
3
4
5
© 2019 Azkoitiko Udala. Lege oharra