Berriak
Salmentak hobetzeko teknikak ezagutzeko tailerrak, mikroenpresa eta enpresa txikientzat
"Arrakastaz saltzeko tresna nagusiak" izenburupean bi tailer antolatu ditu Iraurgi Lantzenek. Bi tailer horietan eskualdeko mikroenpresa eta enpresa txikietako arduradun eta nagusiekin bilduko dira enpresaren arlo komertzialean sakontzeko helburuarekin. Besteak beste, honako kontuak landuko dira tailer horietan: salmenta proaktiboan arrakasta lortzeko beharrezko tresnak, nola kudeatu salmenta egunerokoan, bezero berriak erakartzeko urrats garrantzitsuak, nola komunikatu produktuen / zerbitzuen onurak euren ezaugarri eta abantailetatik abiatuz... Tailerrak otsailaren 5ean eta 19an izango dira, Intsausti Jauregian, 09:00etatik 13:00etara, eta dagoeneko eman daiteke izena.
Kontsumitzaileen informazio bulegoa eta Herrixen merkatari elkatearena, tokiz aldatu dira
Kontsumitzaileen Informazio Bulegoa eta Herrixe Merkatari elkartearena tokiz aldatu dira. Orain arte kultur etxeko aurreneko solairuan zeuden bi bulego horiek, baina orain eraikin bereko laugarren pisura joan dira. Aurreneko solairuan Zubixe elkartearen arropategia jarri dute.
Dagoneko eman daiteke izena Inauterietako disfraz lehiaketan
Bi aste gelditzen dira Inauteriak iristeko eta Udalak prest du jada festetako egitaraua. Urtero legez, mozorro lehiaketa egongo da larunbat gauan eta sariketan parte hartu nahi dutenek izena eman beharko dute, otsailaren 7a baino lehen, Udalaren harrera bulegoan.Kontribuzioan ez da aldaketarik izango
Ordenantza fiskalak onartzeko urteroko prozedura jarraitu du Udalak: batzordeak eta bilkura osoak dagozkien moduan eta dagozkien epeetan egin zituen. Baina erakundeen artean egon diren koordinazio eta komunikazio arazo tekniko batzuk medio, ordenantza horien azken aldaketak ez ziren Gipuzkoako Aldizkari Ofizialean 2012ko abenduaren 31 baino lehen publikatu. Ondorioz, aldaketa horiek ezin dira aplikatu 2013an.
Horrek, Ondasun Higiezinen Gaineko Zergari (Kontribuzioari) eragingo dio batez ere: urte honetan zerga horri ez zaio KPIrik aplikatuko eta etxebizitza hutsei ezartzekoa zen errekargoa ez da aplikatuko.
Guzti horrek herritarrei eta Udalari eragin diezaizkieken arazo eta eragozpenak zuzentzeko ahaleginetan ari da udal gobernua. Bere esku dagoen guztia egingo du eta aurrera begira horrelakorik berriro gerta ez dadin bitartekoak jarriko ditu.
Zubixe elkarteak lokal berria estreinatu du
Urte berria lokal berriarekin estreinatu du Zubixe elkarteak. Lehen kultur etxeko 4. pisuan zeuden, eta orain aurreneko pisua egokitu dio Udalak, euren eginkizunetarako toki gehiago izan dezaten. Izan ere, arropategiko material guztia gordetzeko txiki gelditu zitzaien goiko lokala, eta orain egokiago antolatzeko modua dute. Hori aprobetxatuta, gainera, arropategiko erropak konpontzeko bi josteko makina jarri dituzte, nahi duenak erabiltzeko edo erabiltzen ikasteko.
Xabier Munibe Ikastolako azpiegieturak hobetzeko lanak egin ditu Udalak
Xabier Munibe ikastolaren azpiegiturak hobetzeko obra batzuk egin ditu Udalak Gabonetako opor garaian eta dagoeneko nabarmenak dira onurak. Zehazki, jolastokian, haur txikien komunean, jangelan eta eraikin zaharrean egin dituzte lanak, denak ere orain arteko azpiegiturako hobetu eta konpontzeko. Guztira 81.000 euro kostatu dira lan horirek.
Azkoitia euskal antzerki sarean sartu da, eskaintza hobetu eta zaletasuna areagotzeko
EHAZE Euskal Herriko Antzerki Zaleen Elkartearen sarean sartu da Azkoitia, eta horri esker, urte osoan zehar hilero-hilero euskal antzerki bat ikusteko aukera izango da herrian. Koldarrak antzerki taldearena izan da ekimena: antzerkia egiteaz gain, herrian antzerkia sustatzea ere nahi zuen taldeak, eta EHAZEren sarearen berri izan zuen. Ideia interesagarria iruditu eta kultur mahaiarekin batera, sare horretan sartzea pentsatu du, eta Udalaren laguntzari esker, hala egitea lortu du. Hala azaldu du Itziar Elias Koldarrak antzerki taldeko kideak. Horri esker, hilero euskarazko antzezlan bat izango da Baztartxon. Hil honetakoa ostiralean bertan izango da: Gilkitxaro taldearen '8 begi' antzezlana emango dute, 20:30ean, Baztartxon, 3 euroren truke.
Udalak bat egiten du larunbateko manifestazioarekin eta bertaratzera deitzen ditu herritarrak
Azkoitiko Udalak bat egiten du urtarrilaren 12an euskal preso politikoen eskubideen alde Bilbon egingo den manifestazioarekin eta bertan parte hartzera deitzen ditu herritarrak. Horren adierazle, abenduaren 27ko plenoan Herrirak aurkeztutako mozioa onartu zuen Udalak, eta mozio hark jasotzen duenarekin bat eginda, Espainiako Gobernuari eskatzen dio euskal presoen eta haien hurbilekoen giza eskubideak errespetatzen dituen espetxe politika bat aplikatzeko. Neurri hauek zigorra bizilekutik gertu betetzeko eskubidea eta osasun eskubidea bermatu behar dituzte, baita beraien zigorra bete duten presoen askatasuna eta zigorraren 3/4ak edo 2/3ak bete dituztenen baldintzapeko askatasuna.
| Al | Ar | Az | Og | Or | Lr | Ig |
|---|---|---|---|---|---|---|
|
2
|
3
|
4
|
5
|
6
Data :
2021-11-06
| ||
