Entzierro txikia egin dute gaur Udalekuetako haurrek. Jantzi zuriak eta zapi gorria soinean, egunkaria eskuetan zutela, Gora San Fermin! oihukatu, eta korrika atera dira Herriko plazatik... Irribarrea nagusi umeen aurpegietan! Horra irudiak: 

Bihar, uztailaren 8a, ostirala, aire libreko zineaz gozatzeko aukera izango da Kontzejupean. Udako gau giroa aprobetxatuz, bi filme eskainiko dira, bata haur eta gaztetxoei zuzenduta, eta bestea, familiarra.
Lehenengo filma 19:30ean izango da euskaraz. Ash Brannon eta Chris Buck zuzendarien "Surfak zoratuta" pelikula ikusi ahalko da. 22:00etan, berriz, Santiago Seguraren "A Todo Tren. Destino Asturias" filma proiektatuko da.
Sarrera doan da eta nahi duen oro gertura daiteke filmak ikustera.

Tags:

Azkoitiko Udalak, Gerra Zibileko eta diktadura frankistako memoria historikoa berreskuratzeko egiten ari den lanketaren baitan, oroimen plaka jarri du Joxe Alberdi Elorza Burruntxali (Azkoitia 1922 - Denia 2008) eskultorearen omenez. Bera, Burruntxali, "gerrako umea" izan zen, beste hainbat eta hainbaten artean. Ingalaterrara ebakuatu zuten duela 85 urte. Bakarrik joan zen, familiako inor gabe. Familia askoren zigorra izan zen erbestea, baina Azkoitian ez da bakarrik ihesi joan zen beste haurrik ezagutzen, nahiz eta ordurako Alberdik 15 urte izan.

Udalak, Herrilab+700 parte-hartze prozesuaren baitan, galdetegia zabaldu du Azkoitiko etxe guztietan, herritarren eta eragileen proposamenak jaso asmoz. Iaz, egitasmoaren bueltan, Herri Diagnostikoa landu zen, eta aurten Herri Plana osatzea da helburua.
Behin gure herriak dituen erronkak identifikatuta, hala nola, parekidetasuna, ingurumena, trantsizio ekonomikoa, zaintza, enplegua edota etxebizitza kasu, lan eremu horiekin lotu ahal diren ekintza-proposamenak bildu nahi dira, galdetegien bidez. Finean, erakunde eta gizarte gisa ditugun erronkei guztion artean aurre egiteko ekarpenak lantzea da gakoa.

Proposatutako ekintza gai-eremuarekin lotzea eskatzen da galdetegian, eta baita eragin eremua, sustatzaileak edota partaideak zeintzuk izan beharko luketen ere, proposatutako ekintza hori gauzatzeko.

Udalak herritarrak parte hartzera animatzen ditu, eta ahalegina benetan eskertzen du.

Bi urteko hustasuna eta gero, aurten Azkoitiko herria Andramaixek merezi bezala ospatzeko moduan izango da. Udalak denbora darama prestaketa lanekin, eta itxita ditu jada kontzertuak. Bulego, Egan eta En Tol Sarmiento izango dira aurtengo festetan gauak girotuko dituzten taldeak, beste hainbat ekitaldi eta jardueren artean.
Abuztuaren 14an Bulego izango da oholtza gainean. Taldea sortu zenetik aparra bezala igotzen joan da, eta seguru, herrian, dena emango duela eszenatokian.

Jendetza erakarri du II. Hike bertso saioak. Atzo arratsaldean izan zen Elkargunean eta lehen mailako bertsolariak izan ziren oholtza gainean: Andoni Egaña, Miren Amuriza, Sebastian Lizaso eta Oihana Iguaran. Imanol Artola Felix arduratu zen gaiak jartzeaz eta hark jarritako erronkei erantzuten bapo asmatu zuten laurek. Toka eta noka aritu ziren, eta hainbatetan hitanoa bera izan zuten hizpide.
Elkarguneko Herriko plaza aretoa bete egin zen, eta bertaratutakoak gustura atera ziren saioarekin. Ikusi hemen argazki guztiak
Lau bertsolariek azken agurra abestu ostean, I.Hike eizan! bertsopaper lehiaketako sari banaketa egin zen. Irabazle guztiek ezin izan zuten bertan egon, baina iritsiaraziko zaie saria. Euskara zinegotzi Marijose Arregi eta Ana Azkoitia alkateordearen eskutik jaso zituzten sariak.Hemen saritutako bertso sortak (pdf)

Gipuzkoako Foru Aldundiak jakinarazi duenez, asteburuan GI-631 errepideko zorua birgaitzeko obrak burutuko dira 16,540 eta 17,417 KPen arteko errepide zatian, Munategiko eta Bazterretxeko biribilguneen artean.
Trafikoari ahalik eta kalte gutxien eragiteko, lanak larunbatean eta igandean egingo dira, egunez. Trafikoa noranzko bakarrean antolatuko da, txandakako paso bidez.
Bestalde, Txerloia industrialdeatik GI-631 errepiderako zuzeneko sarbidea ezingo da erabili asteburuan zehar, eta Bazterretxe inguruko biribilgunetik sartzea proposatzen da.
Uztailaren 3ko 19:00etatik aurrera, obretako seinaleak desmuntatuko dira eta zirkulazioa bi noranzkoetan irekiko da.

Al Ar Az Og Or Lr Ig
2
3
4
5
© 2019 Azkoitiko Udala. Lege oharra