Berriak
'Irakurriz gozatu' programa sustatuko du Udalak aurten ere
Udaleko Euskara Zerbitzuek 'Irakurriz Gozatu' egitasmoa martxan jarriko dute aurtengo ikasturtean ere. Hala, aste honetan Gaztezulo hilabetekaria doan banatuko da Floreaga eta Xabier Munibe eskoletan. Zehazki DBH-ko 4. mailako ikasleei banatuko zaie aldizkari hori, sei hilabetez. 'Irakurriz gozatu'-ren helburua gazteen artean irakurzaletasuna sustatzea da, euskaraz irakurtzeko ohitura bultzatu eta euskal prentsa gazteei ezagutaraztea. Horretarako gazteentzat pentsatutako Gaztezulo aldizkaria erabiltzen da eta, bide batez, aldizkari horren hedapenean ere laguntzen du. Ikastetxeek, Donostiako Komunikabideak E.M-k eta Udalak elkarlanean bideratzen dute proiektua.
Jausoro auzora sartzeko trafiko norabidea aldatu egingo da ostegunetik aurrera
Ostegunetik aurrera (urriak 9), Jausoro auzorako sarreraren norabidea aldatu egingo da . Ordutik aurrera, Ibai Ondo kaletik zuzenean sartu ahal izango da anbulategira, eta irteera berriz, Txalon Erreka auzo alderuntz egingo da (bidegorri aldetik), gaur egun dagoenaren kontrako zirkulazio norantzan.
Jausoroko hainbat herritarrek eskatu zuten norabide aldaketa egitea, eta Txalon Erreka-Martirieta auzoetako sarbide berriak ( zubiak) hori egiteko aukera ematen duenez, aldatzea erabaki du Udalak.
Merkataritza establezimenduak egokitzeko diru-laguntzak eskatzeko azken eguna, bihar (asteazkena)
Merkataritza establezimenduak egokitzeko edo berriak irekitzeko inbertsioentzako diru-laguntzak emango ditu Azkoituko Udalak eta laguntza horiek eskatzeko azken eguna bihar (osteguna) izango da, urriaren 3a. Oinarriak hemen dituzue eskuragai, eta eskaria udaletxeko harrera bulegoan egin behar da.
Bide berdea, ekintzailetasuna, energia burujabetza, eta baserri bideak konpontzea lehenetsi dituzte herritarrek
Gipuzkoako Foru Aldundiaren Partaidetzazko Aurrekontuetako 500.000 euroak non inbertitu erabaki dute Urola Erdiko herritarrek.
Hemen herritarrek zehazki aukeratutako proiektuak:
1. Ekintzailetza arloko eskualdeko estrategia garatzea: 122.000 euro.
2. Zestoa eta Zumaia arteko bide berdea osatzen joateko ibilbidean zehar dauden bi tunelen konponketa: 250.000 euro.
3. 2014an zehar lantzen ari den eskualdeko Energia Burujabetza Planak jasoko duen ekimen zehatz bat martxan jartzea: 65.000 euro.
4. Eskualdeko baserri bideen konponketarekin jarraitzea: 63.000 euro.
Gipuzkoako Foru Aldundiak martxoan abiatu zuen Partaidetzazko Aurrekontuen ekimena. Horren helburua da herritarren parte hartzea bultzatzea diru publikoaren kudeaketan, baita partaidetzaren kultura gure gizartean errotzea. Parte hartze prozesu horren berezitasuna da ez dela kontsultiboa, herritarrei azken hitza ematen baitzaio. Herritarrek erabakitzen dituzten proiektuak 2015eko aurrekontuetan txertatzeko konpromisoa hartu du Gipuzkoako Foru Aldundiak eta Batzar Nagusiek berretsi dute.
Larunbatean hasiko da organo erromantikoaren nazioarteko zikloa, organo ikasleen emanaldiarekin
XV. edizioa izango du jada organo erromantikoaren nazioaren zikloak. Orain hamabost urte hasi ziren Azkoitia, Azpeitia eta Bergarako Udalak ziklo hau antolatzen "Gipuzkoako organo erromantikoen ondare aberatsa aprobetxatu eta ezagutzera emateko", eta helburu horrekin jarraitzen dute. Hala azaldu du Esteban Elizondo zikloaren antolatzaile eta organujoleak. Guztira 10 emanaldi izango ditu aurtengo zikloak, eta horietatik lau izango dira Azkoitian, Parrokian. Larunbatean bertan (hilak 4) organo ikasleen kontzertua izango da 11:00etan, eta 20:00etan, Anabel Aldalur mezzoak, Gorka Zabaleta txistulariak eta Fernando Gonzalo organu joleak emango dute kontzertua. Urriaren 11an Esteban Elizondok berak emango du kontzertua, hau ere 20:00etan, eta hilaren 18an, Koruko Andre Maria musika kapera eta Alize Mendizabal organu jolea arituko dira. Aurtengo edizioan Euskalerriaren Adiskideen Elkartean leku berezia izango du, elkartearen 250. urtemuga dela eta. Azkoitiko emanaldiez aparte, Loiolan beste hiru egingo dira, eta Bergaran beste hiru. Hemen duzue zikloaren programa osoa eta emanaldien inguruko informazioa.
Bizenta Mogel XXXIII. ipuin lehiaketa, martxan
Bizenta Mogel XXXIII. ipuin lehiaketan parte hartzeko epea zabalik dago jada. Hemezortzi urtetik gorakoek hartu ahal izango dute parte lehiaketan, eta ipuinak urriaren 31ra bitartean aurkeztu daitezke, udaletxean bertan. Euskarazko lanak izango dira, lau eta hamar orri bitartekoak, eta irabazleak 500 euro eta oroigarria jasoko ditu. Bigarrenak, berriz, 330 euro eta oroigarria irabaziko ditu, eta hirugarrenak 200 euro eta oroigarria. Ipuinak gaitzizen batekin izenpetuta entregatu behar dira. eta gaitzizen berdina daraman kartazal itxi baten barruan idazlearen datu pertsonalak zehaztu beharko dira. Lanak, berriz, orrialde bakarrean idatzi beharko dira, tarte bikoitzarekin. Orijinalak eta inon argitarau eta saritu gabekoak izan beharko dute. Epaimahaiak azaroaren 29an hartuko du erabakia. Hemen dituzue lehiaketaren oinarriak.
Foru Aldundiaren aurrekontuak erabakitzeko bilerak, asteartean eta asteazkenean
Foru Aldundiaren aurrekontua nola erabili erabakitzeko bi bilera egingo dira aste honetan. Batetik, bihar (asteartea irailak 30), 2015ko aurrekontuekin zein proiektu egin aukeratzeko bilera egingo da. Urola Erdiko herritarrek martxoan eta apirilean proposatu eta lehenetsitako proiektuak juridikoki bideragarriak diren eta zenbat kostu izango duten aztertzen ari dira, eta txosten horien emaitzak kontuan hartuta, orain da behin betiko proiektuak aukeratzeko garaia, eskualde bakoitzari dagozkion 500.000 euroak zertan gastatuko diren erabakitzeko. 19:00etan egingo da bilera hori, Azpeitiko udaletxean.
Burujabetza energetikoa eta elikadura burujabetza izango dira Ingurumen Hamabostaldiaren ardatz
Astelehenean (hilak 29) hasiko da aurtengo Ingurumen Hamabostaldia. Herriko eragile eta elkarte ezberdinek egitarau oparoa antolatu dute aurtengorako ere, ingurumenaren inguruan kontzientzia hartu eta ohiturak aldatzeko helburuarekin. Zazpi talde aritu dira Udalarekin elkarlanean aurtengoa antolatzen: Piztu, Baratza Dantzan, Fracking Ez, Oreka, Abarketatxo Ludoteka, Zuhaitzak Bizirik eta Zero Zabor, eta partaidetza hori nabarmendu izan nahi dute guztiek. Adin guztietako herritarrentzako ekimenak antolatu dituzte; hosto bilketa, txakurren gorotzen aurkako kanpaina, dokumentalak, baratze ekologikoetara bisitak, bizikleta martxa, Urbanue ezagutzeko birak... Baina bereziki burujabetza energetikoaren ingurukoek hartuko dute protagonismoa, Piztu elkartearen eskutik: hala eguzki energiarekin hamaiketakoa prestatuko dute, ingenio berriztagarrien erakusketa edo etxeko instalazio fotoboltaikoen tailerra. Elikadura burujabetzari dagokionez, berriz, Baratza Dantzan kontsumo taldeak dokumental bat eta baserri batera bisita antolatu ditu. Hemen duzue egitarau osoa. Udalak ekintzetan parte hartu eta ingurumenaren kontzientzia sendotzen segitzera animatu nahi ditu herritar guztiak.
| Al | Ar | Az | Og | Or | Lr | Ig |
|---|---|---|---|---|---|---|
|
2
|
3
|
4
|
5
|
6
Data :
2021-11-06
| ||
