Azkoitiko Xabier Munibe haurreskolak urteroko usadioari jarraituz, 2013/14 ikasturteko lehen hitzaldia antolatu du, "lau hanketan eta oinez ibiltzen, erakutsi edo ikasi?" lelopean. Hizlaria Psikopedagogian lizentziatua dagoen Nerea Mendizabal izango daHaur bakoitzaren psikomotrizitate madurazio erritmoa errespetatzearen garrantziaz ohartuz, nola lagundu dezakegu haur batek lau hanketan egin dezan? Eta bere momentua iristen denean, oinez nola ikasten du ( erakutsi gabe )? Galdera hauek abiapuntutzat hartuta,hitzaldi honetan hausnarketa eta eztabaida bultzatuko da. Hitzaldia astelehenean (urriak 7), 18:00etan izango da, haurreskolan bertan.

 

Gipuzkoako Foru Aldundia partaidetza prozesu bat ari da egiten herritarrek erabaki dezaten diru publikoa zertan inbertitu. Partaidetzazko aurrekontuak dira.   Azkoitian, urriaren 9an, Elkargunean 18:30ean egingo den aurkezpen-partaidetzazko tailerrera bertaratzera gonbidatzen ditu herritar guztiak Udalak. Zer dira Aldundiaren partaidetzazko aurrekontuak?  Aldundiaren aurrekontuen zati bat zertan erabiliko den erabakitzea herritarren partaidetzaren esku uztea da. Aurten esperientzia pilotu bat egingo da Urola Erdia eskualdean, eta asmoa da ekimen hori eskualde guztietara hedatzea hurrengo urteetan. Zein dira "jokoaren arauak"? "Jokoaren arauak" oso errazak dira: 500.000 euro xedatzen dira Urola Erdiko biztanleek zertan inbertitu erabaki dezaten, betiere Foru Aldundiaren eskumen propioetara egokitzen diren proposamenak izateko baldintzarekin (ez badira egokitzen, proposamen horiek dagokien administrazioetara bideratuko dira). Behin proposamen guztiak jasota, lehentasunak ezarriko dira partaidetzazko eskualdeko batzar batean, eskualdearentzat beharrezkoenak eta mesedegarrienak direnak zehazteko. Ondoren, ebaluazio tekniko bat egingo da horien bideragarritasun juridikoa eta ekonomikoa zehazteko. Azkenik, informazioa emateko eskualdeko batzarra egingo da, Aldundiaren aurrekontuaren zati bat osatuko duten behin betiko proposamenen berri emateko.

Nola parte har dezaket? Zure proposamenak egiteko etxean jaso duzun fitxa bete dezakezu eta  udaletxean, liburutegian edota kiroldegian utzi, postontzietan. Internet bidez ere bidali dezakezu: www.aurrekontuahobetzen.net. Proposamenak jasotzeko epea URRIAREN 17an amaituko da.

 

 

Azkoitiko Udalbatzak honako mozioa onartu du Herriaren aurkako polizia operazioa salatzeko. Hemen duzue mozioa, osorik. Horrekin batera, datozen egunetan antolatutako mobilizazioetan parte hartzera deitzen ditu herritarrak Udal gobernuak, bai herrian egingo direnetara bai larunbatean Bilbon egingo den manifestazio nazionalean ere.

 

Zapatuan, urriak 5, hasiko da XIV. Organo Erromantikoaren Zikloa, eta urriko hiru asteburutan izango da kontzertuez gozatzeko aukera Azkoitian, Azpeitian eta Bergaran. Azkoitiko Amabirjinaren Jasokundearen Parrokiako (1898) eta Loiolako Basilikako (1889) Cavaille-Coll eta Bergarako San Pedro Parrokiako Lope Alberdi (1917) organoak prest daude hainbat bakarlari, musikari eta talderekin batera, asteburutik aurrera hamar kontzertu eskaintzeko. Hemen duzue egitarau osoa

Herrira mugimendu sozialaren aurkako operazioa salatzeko ez ohiko plenoa egingo da gaur, 19:00etan Udal Pleno aretoan. Hemen duzue eztabaidatuko den mozioaren testua, osorik.

Azkoitiko Udalak langabezian dauden lau herritar kontratauko ditu, balio anitzeko peoi lanetan aritzeko. Bost hilabeterako kontratatuko ditu eta epe horretan lanaldi osoan arituko dira langileak, Udalaren ohiko ordutegian Honako baldintzak bete beharko dira lanpostu horietako hautagai izateko: Lanbiden izena emanda egotea, azken sei hilabeteetan Azkoitian erroldatuta egotea, 16 urte beteta izatea, gutxienez eskola graduatua edukitzea eta B mailako gidabaimena edukitzea. Langile horiek aukeratzeko prozesua gaur zabaldu da, eta interesa dutenek urriaren 18a baino lehen eman beharko dute izena Udaleko Erregistro Orokorrean. Lan eskaintzaren oinarriak hemen dituzue eta baita eskaera orria ere.

Udal Gobernuak eta Gipuzkoako Diputazioak lankidetza akordioa lortu dute, eta horri esker, Azkoitiko Udalak Berdintasun teknikari bat kontratatuko du urtea amaitzerako. Berdintasun teknikari horrek %75eko lanaldia izango du eta bere funtzioa izango da udaletik berdintasun politikak garatzea. Hilabete honetan bertan sinatu dute hitzarmena Udalak eta Diputazioak eta horri esker Foru Aldundiak diruz lagunduko du kontratazioa. Datozen asteetan teknikaria hautatzeko eta izendatzeko prozesua martxan jarriko du Udalak, zerbitzu hori lehenbailehen martxan jartzeko. Azkoitiko udalak apustu serioa egin nahi du emakume eta gizonentzat aukera berdinetan oinarritutako gizarte bat eraikitzeko. Udal eta erakundeok geure erantzukizunak hartu behar ditugu eta bitartekoak jarri behar ditugu berdintasun politikak garatzeko, indarkeria matxistari eta emakumeen bazterkeriari aurre egiteko eta emakumeen parte hartzea sustatzeko.

 

Bost talde eragile, 19 ekitaldi, 15 egun eta helburu bat: ingurumenaren inguruko kontzientzia landu eta naturarekin elkarbizitzen ikastea. Zenbaki eta hitz horiekin dator aurtengo Ingurumen Hamabostaldia. Ume, gazte eta helduak, denak ditu jomugan hamabostaldiak, eta guztiak kontzientziatzeko egitaraua antolatzen saiatu da: "Eguneroko ohitura batzuk aldatu eta naturarekin elkarbizitzen ikasi eta erakutsi nahi dugu eta horretarako egin dugu ahalegina", hala adierazi du Inaxio Gorosabel Ingurumen zinegotziak. Hitzaldiak, jolasak, bizikleta martxa... ohiko ekimenek ez dute hutsik egingo, baina badaude berrikuntzak ere: aurreneko aldiz, eta 0 Zabor taldeak antolatuta, bigarren eskuko azoka egingo da larunbatean. Horrez gain, Zuhaitzat Bizirik taldea ere aurkeztuko da, eta Deba eta Zumaia arteko Flyshak ezagutzeko txalupa bidaia gidatua ere egingo da. Horrez gain, Ipintza eta Bizkargi inguruetan auzokonposta egiteko guneak zabaltzeko kanpaina ere zabalduko du Udalak. Etxaniz Autoeskola, 0 Zabor taldea, Oreka bioelkarteak, Barantza Dantzan Kontsumo taldeak eta Zuhaitzak bizirik taldeek eta Udalak elkarlanean antolatu dute hamabostaldia. Hemen duzue egitarau osoa
Al Ar Az Og Or Lr Ig
2
3
4
5
© 2019 Azkoitiko Udala. Lege oharra