Berriak
Enpresek hainbat diru-laguntza eskatu ditzakete jada
Lanbidek eta Gipuzkoako Foru Aldundiak enpresei ematen dizkieten diru-laguntza batzuk eskatu daitezke jada. Hala, enpresetan formazioa bultzatzeko eta urteko plangintzetarako laguntzak atera ditu Lanbidek, eta irailaren 19ra arte dago eskatzeko aukera. Horrez gain, atzerrian lantokiak dituzten enpresentzat praktika kontratuekin euskal langileak kontratatu eta bertan lana egiteko diru-laguntzak ere abian ditu Lanbidek, eta irailaren 30era arte eskatu daitezke. Informazio osoa, hemen.
Gipuzkoako Diputazioak, berriz, "Enpresen arteko lankidetza, eraldaketa eta erreleboa sustatzeko programen deialdia" martxan jarri ditu, eta irailaren 26ra bitartean eskatu ahalko da. Informazio gehiago, Iraurgi Berritzenen (943 85 11 11)
Urbanue abuztuaren 25ean hasiko da martxan
Abuztuaren 25an jarriko da martxan Urbanue, Azkoitiko herri barruko autobus zerbitzua. Dagoeneko autobus paradak margotzen eta seinalizatzen ari dira herrian, eta ordutegiak eta informazio guztia abuztuaren 19an banatuko da etxez-etxe, poltsikorako moduko eskuorri batean.Hiru linea izango ditu Urbanuek: Liburutegia-San Martin-Jausoro-Altzibar bira; liburutegia-Erdigunea-Santa Klara-Txerloia bira eta liburutegia-Erdigunea-Aingeru-Floreaga-Auzmendi bira. Horrez gain Ipintza auzorako joan-etorria ere egingo ditu.
Astelehenetik larunbatera egongo da zerbitzua; igandetan ez da zerbitzurik egongo eta bdaiako prezioa 20 zentimokoa izango da (tiketa autobusean bertan erosi beharko da). Urbanuen ibilbideak eta ordutegiak herritarrekin elkarlanean zehaztu dira. "Gogoratuko duzuenez, partaidetza prozesu bat egin zen urbanuen nondik norakoak zehazteko, eta han jasotakoa oinarri hartuta zehaztu ditugu ordutegi, geltoki eta ibilbideak", adierazi du Xabier Artola udaltzain buruak. Halere, behin behinekoak dira orain hasieran jarritako hauek: hilabete batzuren ostean, aldaketak egiteko premia somatzen bada, egin egingo dira, beti ere herritarren eskarien arabera. "Zerbitzuaren helburua da herritarren beharren araberako ibilbidea egitea, eta horregatik, edozein aldaketa edo hobekuntza proposatu nahi duenari, lasai esateko eskatzen diogu", gaineratu du Urrategi Alberdi alkateak. Urbanue erabiltzera animatu ditu alkateak "Azkoitiarrek eurek eskatuta erabaki genuen zerbitzu hau martxan jartzea, herritarren joan-etorriak erraztuko dituelako, irisgarritasuna hobetuko duelako eta ingurumena zaintzen lagunduko duelako. Merezi duela uste dugu".
Astelehena hilak 11 eta asteartea hilak 12 bitarteko gauean obrak egingo ditu Diputazioak Altzibar auzo inguruan
Gipuzkoako Foru Aldundiko errepide sailetik Udalari jakinarazi diotenez, astelehena hilak 11 eta asteartea hilak 12 bitarteko gauean , GI-631 Azkoitiko bariantean, Altzibar auzo inguruan, "dilatazio junten konponketa " egingo dute. Lan horien ondorioz, baliteke inguruko etxebizitzetan zarata arazoak egotea, eta eragozpenak barkatzeko eskatzen du Diputazioak. Obrak gau batez soilik egingo dira, eta trafikoa ez da bariantetik desbideratuko.
Herriko insumisoek botako dute aurten Andramaixetako txupinazoa
Badatoz Andramaixek. Astebete baino gutxiago gelditzen da festei hasiera emango dien txupinazoa lehertzeko, eta guztia prest du jada Udala. Herriko intsumisoek botako dute aurten txupinazoa, mugimendu antimilitaristak 25 urte bete dituela eta urte hauetan gizarte eta balore hobeagoen alde egindako lana eskertu nahi baitie Udalak. Hortik aurrera, adin, kolore eta gustu guztientzako moduko ekintzak antolatzen saiatu da Udala, horretarako egindako partaidetza prozesuan herritarrek egindako ekarpenak kontuan hartuta. Besteak beste, haur eta gurasoen bazkaria indartu dute, 18ko paella bazkarirako toki eta jateko gehiago jarri dute, eta festetako ekitaldiak herriko gune ezberdinetara zabaltzeko ahalegina egin da. Programa gaur bertan (ostirala) hasi dira banantzen etxez-etxe, baina nahi izanez gero, sakeleko edo tabletean deskargatu daiteke jada. Izan ere, app aplikazioa sotu egin du Udalak Elkarmedia enpresaren bidez. Bertan, egitarau osoa dago ikusgai, bai eguneka eta baita gaika ere, eta horrez gain, herritarrek euren ekarpen iritzia eta ekarpenak egiteko aukera izango dute. Parte hartze, horrek gainera, bere saria izango du: app hori erabiltzen dutenen artean bi sari zozkatuko dira: Elkarmediak emandako tablet bat, eta Udalaren Kultura sailak emandako urte osorako bi zine bono. Aplikazio hori deskargatzeko google storen edo Apple storen 'Andramaixek' hitza jartzea nahikoa da. Andramaixek 400 urte betetzen dituzte aurten, eta urtemuga hori buruan, festez ahalik eta gehien gozatzera animatzen ditu Udalak herritarrak eta bertartauko direna. Ondo pasau Andramaixek!
Hemen duzue egitaraua, pdf formatuan
Aniztasun egunpasa, ostiralean, Attolan
‘Jatorri anitz herri bat, lemapean', Attolara aniztasun egunpasa antolatu du Aniztasun Sailak ostiralerako (abuztuak 8), eta azkoitiar guztiak animatu nahi ditu parte hartzera. Elkartu, elkar ezagutu eta guztiok batera egun eder bat pasatzea da helburua, herriko aberastasun kulturalaz jabetu eta elkarbizitza hobetzeko helburuarekin. Jatekoa, edatekoa eta musika ezberdinak elkarbanatu eta gozatzeko aukera egongo da.Heldu, gazte, ume eta familia oro dago gonbidatuta; norbere jatekoa eta edatekoa ematea nahikoa da, eta musika, instrumentu, jolas edo bestelako joku guztiak ongi hartuak izango dira. Attolara joateko autobusa egongo da, 11:00etan, liburutegi aurrean, dohainik.
Pardelen edukiontziak txartelarekin soilik ireki daitezke gaur arratsaldetik aurrera
Pardelak jasotzeko edukiontziak itxita daude gaur (asteartea) arratsaldeaz geroztik, eta txartelarekin soilik ireki ahalko dira. Orain arte eskatu duten herritar guztiek aktibatuta dute pardelen edukiontzia irekitzeko txartela, baina orain aktibatzea nahi dutenek Hondakinen Bilketa Selektiborako bulegotik pasatu beharko dute (Herriko plazan).Asteazkenetik ostiralera itxita egongo dira Txalon Errekara eta Martirietarako sarrerak
Martirietara joateko egiten ari diren zubiaren lanak direla medio, asteazkenetik ostiralera (hilak 6tik 8ra), itxita egongo da Txalon Erreka auzorako sarrera. Ondorioz, auzo horretako bizilagunek kotxeak auzotik kanpo aparkatu beharko dituzte, egun horietan ezingo baituzte atera. Auzora oinez sartu beharko dira. Martierieta auzorako sarrera ere itxita egongo da egun horietan eta bertako biztanleek Olotzako bide alternatibotik joan beharko dute.
Musika Hamabostaldia asteazkenean iritsiko da Azkoitira
Musika Hamabostaldia Azkoitira etorriko da aste honetan. Asteazkenean ikastaro berezia izango da Amabirginaren Jasokunde parrokian: 'Organo bidezko musika erromantikoa interpretatzeko nazioarteko ikastaroa" emango da bertan, 10:30etik 13:00era, eta hamar estatu ezberdinetako 24 organistek hartuko dute parte: Mexiko, Txile, Kolonbia, Japonia, Errumania, Suezia, Danimarka, Frantzia, Italia eta Espainiakoek hain justu. Horren ondoren, ostegunean (abuztuak 8), 20:00etan, Thierry Escaich organista eta inprobisatzaileak kontzertua emango du, honek ere parrokian bertan. Hemen duzue kontzertu horren inguruko informazio osoa
| Al | Ar | Az | Og | Or | Lr | Ig |
|---|---|---|---|---|---|---|
|
2
|
3
|
4
|
5
|
6
Data :
2021-11-06
| ||
