Berriak
Nola sortu eskualdean elikadura burujabetza landuko duen talde eragile bat?
Urolab ekintzailetasun mugimenduak "Sormen tailerra" antolatu du ostiralerako (otsailak 28). Bertan, "Brainstorming" (ideia zaparrada) teknika landuko da bi erronka nagusiren inguruan: Nola sortu eskualdeko elikadura burujabetza landuko duen talde eragile bat eta nola sustatu eskualdeko ekintzaileen artean coworkinga edo elkarlana? Galdera horien inguruan pentsatu eta iritzia eman nahi duen eskualdeko herritar oro gonbidatu nahi dute parte hartzera. Sormen tailerra 18:00tan hasiko da, Elkargunean, eta esan bezala, eta Urolabeko kideek bertan parte hartzera gonbidatu nahi ditu herritarrak (Iraurgi Berritzen talde eragileko kideetako bat da). Zalantzaren bat izanez gero, Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera e-mail bat bidali. Informazio gehiago: www.urolab.eu webgunean.
Mintzalaguneko kideak Sahatsaren entseguan izan dira
Mintzalaguneko kideek euskal dantzak gertutik ezagutzeko parada izan dute asteburuan. Euskaldun zaharrak eta berriak batu eta euskaraz hitz egitea helburu duen programa horretako kideak Sahatsa dantza taldearen entseguan izan ziren larunbat arratsaldean, dantzariak, dantzak, euren erropak eta euskal folklorearen zati bat gertutik eta protagonisten ahotik ezagutzeko. Hogei bat lagunek egin zuten bisita.
Gogoratu mintzalagun programan urte osoan eman daitekeela izena, bai euskaldun zaharra izan bai euskaldun berria izan. Beraz, norbaitek interesa badu izena emateko pasa dadila udaletik ala AEk-tik ala deitu dezala 943-15 10 89 ala 943-85 71 75 telefonoetara.
Ingurumen saileko diru-laguntzak eskatzeko epea zabalik dago, martxoaren 27ra arte
Irabazi asmorik gabeko erakunde eta taldeek eskatu ditzakete jada ingurumenarekin lotutako zenbait programa eta jarduera egiteko diru-laguntzak. Oinarriak eta eskaera orria on-line daude udal webgunean. Eskariak egiteko eazkeneko eguna martxoaren 27a da.
Azkoitiko Udala ere, irrizale
Azkoitiko Udala irrizale izendatu du Irrien Lagunak Klubak, beste hainat udal eta ikastetxerekin batera. Herenegun izan zen izendapen ekitaldia eta bertan, Elkar taldeko Olatz Osak bertaratutako udal eta ikastetxeetako ordezkariei ongietorria eta eskertza eman eta Klubaren eta proiektuaren jatorria azaldu zien. Gero, Joxe Mari Agirretxek hartu zuen hitza Irrien Lagunak Klubaren izenean eta Klubak azken hiru urteetan egindako ibilbidea laburbildu zuen; irrienlagunak.com webgunea eta abenduan argia ikusi zuen bizipoza.org ataria, klubaren inguruko sare sozialak, ikuskizun eta jolas gune arrakastatsuak, Zeraingo barnetegia, Irrien Lagunak Gizartegintza Elkartea eta, noski IRRIA aldizkaria. Hain zuzen ere IRRIZALE izendapenak irrien lagunak proiektua oro-har eta bereziki IRRIA aldizkariaren sustapenean bidelagun ditugun 59 Udal eta 94 ikastetxe horiei aitortza egiteko egin zuten ekitaldia, antolatzaileek azaladu zutenez.
Diputazioaren aurrekontuetan parte hartzeko hitzordua, asteartean (otsailak 25)
Diputazioak esperientzia pilotu bat jarri zuen iaz martxan eskualdean, herritarren partaidetza handitzeko: Foru Aldundiaren aurrekontuetako 500.000 euro zertan inbertitu erabakitzea bertako herritarren esku utzi zuen. Eta hala eginzuten, Azkoitia, Azpeitia, Zestoa, Beizama, Errezil eta Aizarnazabaleko herritarrok; hainbat bileraren ondoren, honako proiektua lehenetsi zituzten: mendi eta baserri bideak txukuntzea, burujabetza energetikoa lantzeko plangintza bat egitea, haur eta gazteentzat partaidetza programa bat egitea, Lasao eta Zestoa arteko trenbide zaharra egokitzea, eta baita eskualdeko oroimen historikoa eta historia berreskuratzeko plangintza bana egitea. Eta horiek egingo ditu aurten Diputazioak eskualdean, herritarrekin batera. Hori nola egin, parte-hartze esperientzia horren baloratu eta aurtengorako asmoak azaltzeko bilera egingo du Diputazioak asteartean. Besteak beste, bertan izango da Martin Garitano Ahaldun Nagusia.
Pardel berrerabilgarrien erabilera sustatzeko kanpaina abiatu du Mankomunitateak
Bailarako ume txikien gurasoek pardel berrerabilgarrien aldeko apustua egitea nahi du Urola Erdiko Mankomunitateak. "Etorkizuna da, ingurumenarentzat, haurrarentzat eta poltsikoarentzat hobeak direlako". Gipuzkoan sortzen den errefusaren %70-80 pardelek osatzen dutela erakutsi dute datuek, eta hor eraginda hondakinen murrizketa salto handia egingo delakoan daude. Horrez gain, ekonomikoki ere merkeagoa da: batez beste, haur batek bere bizitzan 1.800-2.00 euro gastatzen ditu pardeleta eta berrerabilgarriak erabiliez gero 220 euro ingurekin moldatuko litzateke. Eta garrantzitsuena, haurraren osasunarentzat hobeak dira berrerabilgarriak, produktu toxikorik ez dutelako eta dermatitis arriskurik ez dutelako, besteak beste. Horregatik eta pardel horien erabilera sustatzeko kanpaina bat jarri du martxan Mankomunitateak: datorren astean hitzaldiak emango ditu herri ezberdinetan, pardel horien nondik norakoak azaldu eta zalantzak argitzeko, eta erabilera sustatzeko, 50 familiri %50eko hobaria emango die. Azkoitian datorren ostegunean izango da hitzaldia, hilaren 27an, 18:00etan Elkargunean.
Enpresa txiki eta ertainetan makinaria berritzeko diru-laguntzak
SPRI enpresa garapenerako euskal agentziak enpresa txiki eta ertainentzat RENOVE plana martxan jarri du. Diru-laguntza horrek makinariaren kostuaren %15a finantzatzen du, beti ere makinako gehienez 70.000 euro eta guztira, gehienez, 100.000 euro. Diru-laguntza jasotzeko baldintzak, berriz, honakoak dira: makinak 2014an eskatuta egon behar du eta diru-laguntza eskatzerako kostuaren %10a ordainduta. Eskaera Internet bidez egin behar da (www.spri.es) eta behin dirua jasota, 12 hilabete dituzte makinaria ipintzeko + beste 3 hilabete likidazioa eskatzeko. OSALANek begiztapen lanak egingo ditu, ikusteko makina instalatuta dagoela.
Informazio edo laguntza gehiago behar izanez gero, jarri harremanetan Iraurgi Berritzenekin 943 85 11 00.
Zaborraren eta uraren tasetan hobaria eskatzeko azken eguna: martxoak 7
Zaborraren eta uraren tasetan %90era arteko hobaria lortzeko aukera dute zenbait azkoitiarrek, familiako kideen eta diru sarreren arabera. Hobari horren inguruko informazio osa udaletxeko harrera bulegoan dago eskuragai, eta hobariaren eskaria ere bertan egin beharko da. Azken eguna, martxoaren 7a.| Al | Ar | Az | Og | Or | Lr | Ig |
|---|---|---|---|---|---|---|
|
2
|
3
|
4
|
5
|
6
Data :
2021-11-06
| ||
