Berriak
Musikagune berria eraikitzeko lizitazioa martxan da
Musika eskola, herriko bandak eta herriko hainbat musika talde elkartuko dituen musikagunea eraikitzeko lanak martxa onena doaz. Gune horretarako Elkarguneko lokal handia egokitzeko lanak egiteko lizitazioa iragan astean atera zuen Udalak, eta proiektuak aurkezteko azken eguna apirilaren 22a izango da. Hortik aurrera, proposamenak aztertu eta horietatik egokiena aukeratuko dute adituek, eta behin hori eginda, aipatu lokal hori egokitzeko obrak hasiko ditu aukeratutako enpresak. Ondo bidean, gune berria abendurako eginda egotea espero du Udalak, Musika eskolak, bandak eta musika taldeek trasladoa Gabonetan egiteko modua izan dezaten, eta datorren urterako gune berria martxan egon dadin.
Azoka plazan salmenta postu finko bat herritarren esku jartzeko prozedura zabaldu du Udalak
Azoka plazan salmenta postu finko bat herritarren esku jartzeko prozedura zabaldu du Udalak eta lokal hori eskuratu nahi dutenek dagoeneko eman dezakete izena eta aurkeztu dezakete beharrezko dokumentazioa. Lokalaren erabilera baimena gutxienez 20 urtekoa izango da, eta erabiltzaileek ordaindu beharreko kanona hilean gutxienez 428,32 eurokoa. Eskaintzak aurkezteko azken eguna apirilaren 23a da. Informazio osoa udal wegbunean dago eskuragai, kontratazioen atalean.
Hurrengo asteartean (apirilak 1), zurrumurruen aurkako estrategia komunikatibo eta emozionalak aztergai
'Zer ari haiz esaten?' izenburupean zurrumurruen aurkako tailerra egingo da datorren asteartean (apirilak 1), Aniztasun Sailak antolatuta. Raquel Moreno D-Casek emango du tailerra, Xarxa Antirumorseko kide eta Bartzelonako Diputazioko aholkulariak. Zurrumurruen aurkako estrategia komunikatibo eta emozionalak landuko dituzte eta saioa teoriko praktikoa izango da. Helburua da estereotipo eta zurrumurruei bide ematen dieten gezurrek duten eraginaren inguruan kontzientzia kritikoa sortzea eta gero kontzientzia kritiko hori praktikan jartzen ikastea. Saioa 18:30ean izango da, Elkargunean.
Herriko egoera aztertu ostean etorkizunera begira jarriko dira ostiralean gazteak
‘Gaztien herrixe moiu ipurdixe' gazte topaketen bigarren saioa izango da ostiralean. Bertan, etorkizunera begira jarriko dira Azkoitiko gazteak eta besteak beste Azkoitiko gazte mugimendua indartzeko zer egin daitekeen aztertuko dute, gazteek eurek zer egin dezaketen, Udalak zer egitea nahiko luketen... 19:00etan izango da afari-topaketa, Elkargunean. Orain bi aste izan zen aurreneko saioa, eta orduan Azkoitiko gazteen egungo egoeraz hausnartu zuten bertaratutakoek. Horretarako, aurreko asteetan egindako hainbat elkarrizketetan bildutako informazioa hartu dute oinarritzat. Elkarrizketak lokala duten eta ez duten gazteen artean egin dira. Elkarrizketekin 300 gazte inguru ordezkatu dira, Azkoitiako 17-22 urte arteko gazteen erdia.
Pintxo ta Mintzo antolatu dute Urolabek eta Azpeitiko Gaztetxeak, ekintzailetasuna sustatzeko
Urolab taldeak (Urolan ekintzailetasunaren kultura bultzatu nahi duen talde irekia) eta Azpeitiko Gaztetxeak, elkarlanean, ekitaldi berri bat prestatu dute datorren ostiralerako (martxoak 28rako): Pintxo ta Mintzo. Ekintza hau, Urolab taldeak urtarrilean jarri zuen "12 hilabete, 12 ekintza" helburuaren barnean kokatzen da, eta ekintzailetasuna sustatzen jarraitzeko asmoa du. Martxoko azken ostiralean, ekintzailetasunaren inguruan eztabaidatzeko mahai inguru bat antolatu da Azpeitiko Gaztetxean. Bertan, ekintzaile ezberdinen kasuak ezagutzeaz gain, gai horren inguruko hainbat alor landuko dira mahai inguruan. Besteak beste, ekintzailetasunak bailaran duen egoera, ekintzailetasunak lanpostuen sorreran duen eragina, ekintzailetasunaren kultura bultzatzea, e.a. Mahai ingurua girotzen laguntzeko, parte hartzaileek jan-edanean aritzeko aukera izango dute. Horretarako, aurrez, 3 € ordaindu beharko dira. 19:30ean hasiko da ekimena.
Organikoaren edukiontzia erabitzeko ikastaroa egingo da ostegunean
Urola Erdiko Mankomunitateak ikastaroa emango du ostegunean (martxoak 27), bosgarren edukiontziaren erabileraren nondik norakoak azaltzeko. Beraz, etxeko hondakin organikoa jasotzeko erabiltzen den edukiontzi hori erabiltzen hasi nahi dutenek ordutegi honetan izango dute ikastaroa egiteko aukera; goizez 11:00tatik 12:00etara bitartean eta arratsaldez 18:00etatik 19:00etara, Elkargunean. Ikastaroaren iraupena 15 minutukoa izango da gutxi gorabehera. Ikastaroan parte hartuko dutenei bosgarren edukiontzia erabiltzeko argibideak, etxerako edukiontzi txikia, poltsa biodegradagarriak eta kaleko edukiontzi marroiko giltza emango zaizkie.
Udal ordainagirien inguruko banku informazio sistema aldatu egingo da
Gipuzkoako gainerako udalerriek bezala, Azkoitiko udalak ere SEPA sistema jarriko du martxan kontuhartzailetzan, eta horrek aldatu egingo da herritarrek udal ordainagirien inguruan jasotzen duten banku-informazioa. Hala, banketxeak bidaltzen duen ordainagirian oinarrizko datuak agertuko dira eta horrekin batera, beharrezko erreferentzia eta klabea ere bai, ondorengo web-orri honetan ordainagiriaren xehetasunak ikusi ahal izateko:http://dokumentuak.gipuzkoa.net
| Al | Ar | Az | Og | Or | Lr | Ig |
|---|---|---|---|---|---|---|
|
2
|
3
|
4
|
5
|
6
Data :
2021-11-06
| ||
