Berriak
Laja Fest tarteko, Urbanuek, herri barruko autobus zerbitzuak, geraldia egingo du Lajan
Ostiraletik igandera bitartean ospatuko den Laja Fest jaialdia dela-eta, Udalak autobus zerbitzua jarriko du joan-etorrietarako. Herri barruko autobus zerbitzuak, Urbanuek, geraldia egingo du Laja jatetxe parean.
Ostiralean, 16:40tik aurrerako zerbitzuan geraldia egingo du autobusak Lajan, eta larunbatean eta igandean, 12:10etik aurrerakoetan ere bai.
Udalak ibai garbiketa lanak hasi ditu
Udalak ibai garbiketa lanak hasi ditu gaur Urola ibaiko hondakinak ateratzeko. Lanak egiteaz udal brigada eta Txukun Lorazantza enpresa arduratuko dira. Jarduketa hiru eremutan gauzatuko da. Batetik, Ipintza eta Jausoro arteko eremua garbituko da, Altzibarko presan hasi eta Jausoroko zubi parerainoko tartea, alegia. 1,90 km-ko luzera du eremuak.
Garbituko den bigarren eremua Basterretxe industrialdetik –Eroskiko aparkalekutik- Berrosuetako zubi parera doana da. 1,50 km-ko luzera du tarte horrek.
Ekintzaileen Nazioarteko Eguna: Tokiko ekintzailetza gure udalerriak biziberritzen
Atzo, apirilak 16, Ekintzaileen Nazioarteko Egunean, eskualdean enpresa sortu berri duten ekintzaileak omendu nahi izan zituen Iraurgi Berritzenen ekintzailetza arloko lan taldeak. Lehenengo aldiz, “Aldaketa ereiten: ekintzaileak eta hauen ekarpena eskualdean” ekitaldia ospatu zen.
Bertan, 2023an enpresa sortu zuten ekintzaileek egindako ahalegina eta eskualdean ehun-sozioekonomikoan izan duten inpaktu positiboa balorean ipini ziren. Guztira, 16 egitasmo berri sortu ziren iazko urtean. Lau ostalaritza jarduerakoak izan ziren, bost jarduera profesionalak, bi merkataritza txikiak, bi osasunari loturiko jarduerak eta hiru beste jarduera batzuk.
Ostiraleko partidarako pilotak aukeratzen izan dira Elordi eta Artola Gurea pilotalekuan
Partiduen aurretik Irulitxa Fanfarrea txaranga ibiliko da kaleak girotzen.
Elordi eta Artola izango dira ostiral honetan Gurea pilotalekuan. Buruz Buruko Txapelketako bigarren jardunaldia jokatuko dute, eta gaur Azkoitian izan dira bi pilotariak material aukeraketa egiteko. Partidu garrantzitsua izango da, eta pilotazaleentzat gozatzeko hitzordua, dudarik gabe. Frontoira joan aurretik kalean ere izango da entretenimendua. Arratsalde-gaua borobiltzeko, Udalak antolatuta, Irulitxa Fanfarrea txaranga ibiliko da kalez kale 18:30etik 20:30era, festa giroari bide emanez. Kirola eta festa uztartuko dira, beraz, ostiralean.
Udalak errenta aitorpena euskaraz egiteko gonbita egin du
Herritarrek administrazioarekin dituzten harremanak euskaraz izan daitezen bultzatu nahian, Udalak errenta aitorpena euskaraz egiteko gonbita egin du, UEMAk abiatu duen kanpainarekin bat eginez.
Iaz Azkoitiko bizilagunek egindako 6.282 errenta aitorpenetatik 2.193 euskaraz egin ziren. Hau da, %35. Helburua da urtez urte kopuruak gainditzen joatea, euskarari bide berriak zabalduz eta administrazioaren euskalduntzea sustatuz.
Parrokiaren eta Idiakez Ederra etxearen arteko babes-egitura erretiratzeko lanak hasi dira gaur
Lanak tarteko, Herriko plazako ohiko sarbidea itxita egongo da trafikoarentzat gaurtik asteazkenera bitartean. Herriko plazara Inazio Iriarte Margolaria kaletik sartu ahalko da.
Idiakez Ederra Etxea, Nagusia 80, zaharberritzeko lanak azken txanpan sartu dira. Aste honetan bertan erretiratuko da Kale Nagusian, Parrokiaren eta Idiakez Ederra eraikinaren artean dagon babes-egitura. Gaurtik asteazkenera bitartean burutuko dituzte 2009tik dagoen babes-tunela kentzeko lanak. Lanek irauten duten bitartean, Herriko plazako ohiko sarbidea itxita egongo da ibilgailuentzat parrokiaren parean, eta beraz, autoek Inazio Iriarte Margolaria kaletik izango dute sarrera. Bestalde, Parrokia parean, trafikoa, kiroldegiko biribilgunerantz bideratuko da.
Gorputz titere tailerra antolatu du Aizkibel Liburutegiak
Aizkibel Liburutegiak Gorputz Titere Tailerra antolatu du. Apirilaren 25ean izango da, 18:30etik 20:00etara bitartean. Ekimena LH1, LH2, LH3 eta LH4 adin tartean dauden haurrei zuzenduta dago. Parte hartu nahi dutenek aurrez izena eman beharko dute liburutegian bertan edo 943 85 08 98 telefono zenbakira deituta. Izena emateko epea gaur zabaldu da eta apirilaren 25ean itxiko da.
Azkarate gaineko tuneleko tartean zirkulazio motelerako erreiak lehentasuna izango du aurrerantzean
GI-2634 errepidean, Azkarate gainean bide-segurtasuna hobetzeko margoketa eta seinaleztapen lanak egingo ditu asteburuan Bide Azpiegituretako departamenduak, eguraldiaren arabera garatuko direnak. Bide-segurtasuna hobetzeko helburuarekin, besteak beste, tuneleko errei motelak lehentasuna izango du aurrerantzean, azkarrak beharrean, eta beheranzko norabidean (Azkoitira), errei gehigarriaren itxiera aurreratu egingo da.
| Al | Ar | Az | Og | Or | Lr | Ig |
|---|---|---|---|---|---|---|
|
7
| ||||||
|
8
|
10
| |||||
|
15
|
16
|
17
|
18
| |||
|
24
|
25
| |||||
