Udalak kontu handixeagoa eskatzen du hondakinak edukiontzietan botatzerakoan, bakoitzari dagokion erabilera emateko

2015/09/21, Astelehena - 15:09

Inprimatu

Hondakinak sailkatzeko orduan, herritarren sentsibilizazio maila altua dela erakusten dute datuek. Ondorioz, gaikako bilketa portzentaia altuetara iristen da, mailari eutsiz. Alabaina, martxotik hona ikusi da inpropioen kantitateak gora egin duela, alegia, edukiontzi bakoitzari ez dagokion material kopurua. Materia organikoaren edukiontzietan eta ontzienetan gertatzen da hau. Honek kostu ekonomiko handia suposatzen dio Udalari.

Esaterako, ohiko hutsegiteetako bat da edukiontzi marroietan materia organikoa botatzeko edozein plastikozko poltsa erabiltzea, biodegradagarriak soilik erabili daitezkeenean.

Horregatik, udal ordezkariek kontu handixeagoa eskatzen dute zaborrak botatzerako orduan, edukiontzi bakoitzari dagokion erabilera eman eta horrela, baliabideak optimizatzeko.

Edukiontzi marroiaren erabilera okerra egiteak, kantitate txikietan izan arren, edukiontzi osoa kutsatzea suposatzen du. Hau da, edukiontzi marroiko hondakin guztiak zabortegian amaitu dezakete, konpost plantan bukatu ordez. Hondakin plantetan ez da bigarren sailkapen bat egiten ez dagokion materiala bereizteko.

Udalbatzak aurreko uztailean onartu zuen Urola Erdiko Mankomunitateari azterketa teknikoa eta ekonomikoa eskatzea edukiontzien sistema ezartzeko, herri-kontsultaren emaitza errespetatzeko asmoz.

Alabaina, Udalak argi du hondakinen bilketa sistema aldatzeak ez duela esan nahi finkatutako birziklapen tasak betetzeko konpromiso maila jaistea.

Gehiengoa ondo ari da egiten eta sailkapen mailak mantentzeak hori baieztatzen du. Udalak, ordea, beharrezkotzat jo du, ondorioak ezagutu gabe seguruenik, nahasteagatik edo utzikeriagatik, edukiontzien erabilera okerra egiten dutenak ohartaraztea.

Udalak Mankomunitateari informazio zehatzagoa eskatu dio soluziobideak jartzeko. Ikusi behar da inpropio kopurua gune edo auzo batzuetan handiagoa den, edukiontzi guztiak ondo dauden, informazio eza den…

Jakinarazten dizugu webguneak berezko zein beste batzuen cookieak dituela, eta horien bidez zerbitzu hobea eskaini nahi dizugu, eta nabigazio-esperientzia hobetu nahi dugu. Webgunetik nabigatzen jarraitzen baduzu, horrek esan nahi du onartzen duzula aipatutako helburuekin cookieak erabiltzea. Informazio gehiagorako Cookie politika.

Onrtzen dut